來自Tâi-oân的明信片

今朝一早去體檢,今次又算幾快,九點左右就搞掂。

無幾耐之前盧欣喺微信問我攞地址,因為睇到佢發朋友圈定位喺台灣,所以我當時就估到佢係想寄明信片畀我。返到小區之後心血來潮睇下個信箱,盧欣好似都未返嚟,但係啲明信片就已經寄到,效率真係高!

承恩門伊張係寄畀佢自己嘅,寄語係“终身美丽”。
“國父紀念館”伊張係小慧嘅, 叫佢“工作加油!”
西門紅樓伊張係表姐嘅,祝佢“身体健康”。
總統府伊張係畀大肥種嘅
國立故宮博物院伊張係寄畀我嘅, 佢話“台北总统府 ××中,给你羡慕一下^_^ ”有一兩個字實在睇唔清楚——佢買明信片嗰時人哋重有五分鐘就閉館,可能因為噉所以寫得太潦草。

其實,揾對象揾著個日本仔,屋企人係應該理解同支持嘅;但係搞到好似非日本仔不嫁,噉就未免有啲走火入魔喇。不過,雖然唔係咁認同佢嘅婚戀同價值觀,但係有時真係好羨慕佢。喺學校做嘢就係爽,一年兩個帶薪長假。成個暑假佢基本上都唔喺屋企,七月份開始就去咗日本見條仔,我喺Twitter睇到佢發嘅親密照,應該發展得幾好下。喺日本玩咗個幾月又飛台灣繼續瀟灑——不過又啱嘅,聽講台灣自由行要取消喇,抓緊時間去多次又未嘗唔好。同環姨去台灣已經係2016年嘅事喇,台灣雖然唔算好大,但係一個星期真係唔夠,台北、九份、花蓮、墾丁、高雄……基本上都係走馬觀花,而且有好多地方(例如台北故宮)都係返到嚟至省起該去而未去。如果可以嘅話,其實我都想去多次——要預先做定充足嘅計劃。

惗返轉頭,我已經有好耐無見過盧欣,以前成日一齊去唱K、睇電影、飲夜茶……但係最近三幾年每次約親佢,唔係去上日語課就係要備考日語等級試,一唔係就自己有節目,甚至連過年嗰幾日同清明拜山都唔見人。如果以後佢真係嫁咗去日本,噉就更加少機會見到面喇——甚至可以話,基本上無機會見。不過,隨年漸長梗係會一路路疏遠㗎啦,邊有可能成世都咁親密?唉,都係順其自然啦。

とにかく、はがきを送ってくれてありがとう。

雖然我唔係幾中意嗰啲形狀不規則嘅明信片,因為收藏唔方便。不過,伊一張值得永久珍藏嘅。人各有志,人哋有人哋嘅惗法同打算,無論點旁人都唔應該過多噉樣說三道四,祝福佢啦。

PS:

下晝喺北京路廣百嗰間帝舵專賣店多口問咗句,原來青銅碧灣都要排隊,皮帶嗰款要等十幾個,其它款無問。唉,感覺開始有啲瘋狂喇。而且,唔係我想拋書包或者故意“找碴”,點解“Black Bay”要譯成“碧灣”呢?唔係好明。唔通“雅”凌駕於“信”“達”之上係理所當然嘅?

哦,重有:今朝喺三元里個地鐵站又畀人截住查身份證,好在有帶,唔知又發生咩事呢?唉,感覺伊個時勢並唔似刻意粉飾得咁太平啊。