搞咗幾個鐘，終於整好咗哩個博客。講起真係慚愧，如果無記錯嘅話哩個域名應該係我舊年生日嗰日註冊嘅，一直到今晚先搞得掂，如果唔係個客服好耐心噉幫我怕者仲唔知要搞到幾時。

玩博客已經足足有八年啦，由最初嘅騰訊空間到新浪博客、網易博客、博客園、博尚、再到今晚嘅Wordpress，唔驚唔覺已經轉移咗幾次陣地。每一次去一個新開網站註冊新嘅博客都想將過去嘅所有嘢都拋低，每一次都同自己講：“哩個博客我凈係會記錄低一啲開心嘅事。”亦都係因為噉樣，曾經試過有幾年嘅時間我都無更新過個博客。

與其話“博客搬家”，我覺得自己更加似搭車，從騰訊空間到新浪博客、網易博客、博客園、再到博尚，一站一站噉搭過嚟，而今次哩一站就係Wordpress。

唔知我以後會唔會就噉喺Wordpress落地生根、唔知Wordpress會唔會係最後一站、唔知下一站會喺邊，起碼從今晚開始，自己人生嘅經歷、生活中嘅點滴又可以有個家安定落嚟。

人生在世，唔如意嘅事十有八九啦，我唔會再強迫自己凈係寫一啲開心嘅事。總之，順其自然啦。

今晚真係好感謝嗰個客服幫我搞點咗哩個博客，等我可以喺哩度講出自己想講嘅話、記錄低自己經歷過嘅事同身邊發生嘅嘢。