今日，我喊咗幾次。

阿媽返嚟嘅時候同我講，醫生話老竇可能有惡性骨髓腫瘤，雖然唔確定，但係可能性好高。要將個樣本送去武漢化驗，幾日先有結果。聽到之後，我成個人都愕曬然，一時間我真係唔知點算。之前伯爺生癌，走咗一年都唔夠，而家醫生又話懷疑老竇有惡性腫瘤。老竇辛苦咗幾十年，今年先啱啱退休，點解無啦啦就有啲噉嘅嘢呢？

攞飯去俾佢食，佢顯得好平靜。望住佢坐喺病床食飯，我越睇越覺得心酸，忍唔住流起眼淚，但係佢無講乜嘢，食完飯就叫我走。

行出病房之後，我又忍唔住大喊咗一場。

返到屋企先知原來佢仲俾人蒙在鼓裡，阿媽周圍搵人商量到底話唔話佢知好，我一時都唔曬主意。

醫生約咗我阿媽聽日去醫院講解老竇嘅情況，仲叫埋我去添。我真係好唔想佢有事，但係我乜都做唔到。

今晚，從醫院行返屋企嗰段路，好凍啊！