“年晚煎堆——人有自己有就算。”我阿媽今晚講咗不下三四次。

今次個女仔姓黎、叫阿華、喺火車站嗰邊嘅鞋城做會計、好似係望崗人——龍姨話佢哋係同一個地鐵站落嘅。

地點又係美華二樓、230號檯，過程無咩特別，只係喺上菜嘅時候特然間覺得，次次相睇都係出嚟食飯，次次出嚟食飯都係為咗相睇，自己嘅經歷都可以翻拍一部《飲食男女》同《相睇一刻》嘅屌絲版——當時我忍唔住想笑。

唉，其實我真係好攰。

PS:

前日安安喺微信同我講，佢升咗做生產部嘅中層，調返廣州嘅機會越嚟越渺茫，27號到29好去重慶開會，今朝睇到佢發朋友圈，佢哋重慶分公司正式揭牌，間廠都幾新淨幾骨子喎。

前日開始又降溫，唔知點解我覺得條腰骨梗曬、好痛，同小慧去跑步都無乜點跑，唔知係唔係開始有啲風濕呢？唉，年紀大咗真係唔到你唔認老。