曾經睇過一篇鷄湯文羅列“男人不成熟的Ｎ大表现”，其中有一條就係“期望前女友回心转意”。所以自從阿婷唔睬我之後我就强迫自己對佢死心。

但係二月底三月頭嗰两日個媒人同我阿媽講，話阿婷打電話俾佢，喊住話對我係認真嘅、完全係我誤會咗佢。我阿媽叫我如果仲對阿婷係有心嘅就認下低威，主動打返電話俾佢。

3月8號話陪阿媽食飯、3月9號話公司開會……經過將近十日嘅苦苦哀求，今日阿婷終于肯出嚟同我見面——喺人民北嗰間澳門街食飯。點完餐之後我送咗之前應承過嘅嗰兩張航天幣俾佢，佢好開心、笑得好甜。

可惜食完飯我話送佢返屋企佢就點都唔肯，喺火車站嗰個站寧願行出地鐵企喺站臺同我鬥耗。一開始話天氣凍唔想我走嚟走去太辛苦，我堅持話無所謂，后嚟佢先話約咗人。最後我求佢俾我送到佢去嘉禾望崗，佢先勉强應承，佢話佢細佬部車就喺出面，叫我唔好跟埋出去。后嚟佢又發微信俾我，話今晚真係有事先唔使“麻煩”我，無其他意思，問我有無嬲。其實，嬲就無嬲，不過真係俾佢搞到無曬主意——唔知我個人生性多疑定係已經成咗驚弓之鳥呢？同之前幾個嘅結束都係以對方唔肯俾我送到返屋企爲先兆嘅。

今晚，佢點都唔肯俾我拖佢隻手。一罐過咗期嘅鳳梨罐頭，係唔係真係有人會執返嚟食？

淘寶——我曾經喺哩個咁容易令人失去理智嘅網站裏面睇到一句至理名言：“人生就是一场豪赌”。無幾耐之前查過下，自己幾張銀行卡都差唔多無曬錢。唉，溝女真係燒錢。比炒燶股票更加慘嘅就係，伊場豪賭到底搏唔搏得過，根本唔到自己去權衡。

ＰＳ：

唔知係唔係貪我把口夠密呢？好多女仔有心事都會搵我傾訴，我從來唔會開解人哋，衹會靜靜噉聆聽。可能係我由細到大已經習慣咗伊種壓抑感，又可能我真係麻木得咁緊要，我守埋守埋人哋好多秘密，但係一啲都唔覺得辛苦，反而對伊種角色樂在其中。兩年幾以嚟，伊個blog一直默默無聞，我一直喺哩度自言自語，偶然見到有人注冊訂閲，我會感到有啲受寵若驚。我一直都係“看别人的故事，流自己的眼泪”，原來一個觀衆嘅人生都會有屬於佢自己嘅觀衆。但係——

噚日我個blog俾人hack咗，完全登錄唔到，搵人幫我搞咗兩個幾鐘先勉强叫做“搞掂”，但係無咗好多嘢。真係唔明，又唔係乜嘢名博大Ｖ，更加無乜嘢影響力，純粹就係記錄下生活中嘅點滴啫，啲人點解要噉樣做、hack嚟做乜？嗰個哥哥仔叫我“修改一下后台密码”、“然后把多余的用户全部删除”、“设置成不允许别人注册”㖞。唉，希望有用啦。