醫生話，雖然結果未出，但係兩項重要指標都符合，所以基本上可以確定老竇個病，所以今日就開始做化療。

老竇知道咗自己嘅情況之後表現得好平靜，但係我見到佢幾次藉住攞毛巾抹面嚟抹眼淚。醫生同好多人都話最緊要放鬆心情，開朗啲、樂觀啲去面對。唉，伊個世界永遠無話“感同身受”，安慰人哋就好地地，真正發生喺自己身上就完全唔係噉回事。

聽阿媽同阿叔佢哋講起，關於懷疑有惡性腫瘤嘅事，其實老竇喺正骨醫院嗰時啲醫生就話咗俾佢知，只不過佢一直瞞住我同阿媽。老竇仲同姨丈佢哋講：我個人太單純、唔夠獨立，最擔心我搵唔到女朋友，然後先閉翳自己。

原來，人好容易就會流眼淚。由細到大我經歷嘅逆境同挫折已經夠曬多，但係我從來未試過咁驚、咁無助，除咗眼白白噉睇住佢瞓喺度吊針，根本乜都做唔到。

唔知氣溫真係降咗定係心理作用，原來唔單只係我，連阿媽都覺得伊兩日真係凍咗好多。

今日，我喊咗幾次。

阿媽返嚟嘅時候同我講，醫生話老竇可能有惡性骨髓腫瘤，雖然唔確定，但係可能性好高。要將個樣本送去武漢化驗，幾日先有結果。聽到之後，我成個人都愕曬然，一時間我真係唔知點算。之前伯爺生癌，走咗一年都唔夠，而家醫生又話懷疑老竇有惡性腫瘤。老竇辛苦咗幾十年，今年先啱啱退休，點解無啦啦就有啲噉嘅嘢呢？

攞飯去俾佢食，佢顯得好平靜。望住佢坐喺病床食飯，我越睇越覺得心酸，忍唔住流起眼淚，但係佢無講乜嘢，食完飯就叫我走。

行出病房之後，我又忍唔住大喊咗一場。

返到屋企先知原來佢仲俾人蒙在鼓裡，阿媽周圍搵人商量到底話唔話佢知好，我一時都唔曬主意。

醫生約咗我阿媽聽日去醫院講解老竇嘅情況，仲叫埋我去添。我真係好唔想佢有事，但係我乜都做唔到。

今晚，從醫院行返屋企嗰段路，好凍啊！

之前唔知點解一直登錄唔到，又上網搜又求人。

最後個客服幫我刪曬啲垃圾留言終於搞掂，原來係數據庫滿咗。

但係之前啲留言就全部無曬啰。

不過點都好啦，都係要多謝嗰個客服咁耐心噉幫我解決問題。

唉，原來唔懂技術真係寸步難行㗎！