今日阿英個二舅父幫個孫擺滿月酒，請我哋去飲。雖然我要戒口，牛、羊、海鮮、雞蛋、辣嘢同煎炸嘢一律唔食得，而且今日我原本係上中班（J1）嘅，但係考慮到最近我同阿英多咗好多拗撬，費事逆佢意令佢失望，所以專門調咗個早（A1）班嚟上，阿英請兩個鐘假就得。本來啲時間就得好啱。

但係，都係去唔成。原來佢見個老闆連續幾日下晝都唔喺度，居然惗埋啲縮數，唔同個老闆請假，惗住四點鐘同個行政講聲就走——可能噉樣就唔駛扣錢。點知個老闆今日成個下晝都喺度，重安排鬼咁多嘢畀佢做。

啱先睇到佢發朋友圈話：“不怕神一样的对手，就怕猪一样的领导。”

我心惗：關鬼跑跑哥事咩！邊個叫你明知要去飲都重咁大安主義？卒之咪一鑊翹起自己囉！

不過我喺微信就話無所謂，話佢兩句肯定又嬲。

唉，無辦法啦，飯始終都要食嘅，但係我已經同我老母講咗今晚去飲、唔返屋企食飯，所以唯有出去食。

其實今餐都食得唔算差，不過就喜相逢變大家樂囉。

嗰邊禮到人唔到，伊邊食飯重要自己睇數。馬鹿野郎！

食完餐飯阿英重話唔係好夠飽，於是又去附近嗰間“開運甜品”繼續。

之前好幾次經過都無留意有間噉嘅嘢，唔知係唔係最近新開嘅，感覺出品都過得去啦。

其實大家樂嗰個 “咋咋淋”鐵板牛扒套餐我都好中意，之所以唔食係因為最近生濕疹要戒口——大大話話兩三個月喇，真係苦不堪言。

最先去省婦幼睇過，係阿英幫我掛嘅號，好似重係主任醫師，食咗一個星期藥、搽咗一個星期藥膏，無乜效；跟住去皮防所又驗血又打針又食藥又搽藥膏又照紫外線……睇咗兩次，一次就成千蚊，一開始係幾掂嘅，但係好得咁上下又反反復復；最後我阿媽帶我去中醫學院睇內科，中醫雖然見效慢，但係真係慢慢好轉。繼當年因為慢性咽炎一直睇開嘅陈镜合教授之后，何教授又係一個救我於頑疾煎熬之中嘅妙手良醫。

何教授醫術固然了得，但係更加引我注目嘅係佢手上戴住嘅嗰隻名士——Clifton系列嘅MOA10099，小眾、低調、品味與氣質兼備，教授果然眼光獨到，一隻手錶同一身白袍居然可以搭配得如此氣度不凡，真係令人心動。

小三針設計、錶盤直徑41mm、ETA 6498-2機芯、動力存儲38h、 振頻28800.0vph/3.0hz、防水性能5 ATM。

曾經聽過“醫生配積家”嘅講法，其實配名士一樣咁襯啊。名士戴“名士”，襯到絕！

其實，曾經我唔中意戴手錶，因為嫌佢箍住隻手唔舒服，反而中意陀錶，但係睇過好多鐘錶專賣店都無得賣。2014年去日本終於買咗一隻東方雙獅——好似係喺秋葉原買嘅。

隻錶係幾好睇嘅，但係硬係覺得差噉啲嘢，到底邊度唔妥又講唔出，所以我都無點攞嚟玩，跟住搬咗兩次屋重唔見埋添，最近先搵返。

無幾耐之前又喺闲鱼入咗一隻古董錶，感覺幾唔錯。

堅定流我唔識分，但係幫襯得佢我就無打算懷疑。好靚、好墜手、好有質感、走時非常之有力，“嘀嗒嘀嗒”嘅聲音真係好動聽，聽落就好似一位年邁嘅智者喺度講述緊佢喺嗰個年代所經歷嘅故事……我有啲明白，喺日本買嗰隻雙獅，缺少嘅可能係一種歷史嘅沉澱、同歲月嘅滄桑。

噉樣嘅陀錶把玩起身先有感覺。