第47次相睇，相約嘅地點係五月花四樓嗰間西貢小姐，311號檯。個女仔姓曾、叫阿穎、86年、住喺中山七路、喺大南路一間物流公司做出納。

之前經歷過咁多嘢，我對今次相睇本來就唔抱乜嘢希望，所以亦都無話點失望。

反正，順其自然——又或者講：聽天由命囉。除咗噉樣都有乜辦法？

7月31號返蚌湖參加督導培訓，又俾我見返張建強。自從佢調咗去三元里之後就一直都無見過佢囉，估唔到今次同佢同一批培訓督導。

兩年幾無見，原來佢已經結咗婚。唔單只我感到意外，我同會姐講起哩件事嘅時候，連會姐都覺得不可思議：“哎喲，動作這麼快？”聽佢講，佢老婆好似都係我哋公司嘅。點都好啦，其實我幾為佢開心。

兩年幾無見，今次見返面我覺得佢好似同以前有啲唔同，但係具體有啲乜嘢唔同咗又講唔出。可能，結咗婚之後成熟咗啩？

不過，男人梗會越嚟越成熟㗎啦，唔同好似我噉咩？唉！

PS.

噚晚第一次上督導班，踢晒脚啊！雖然唔使收錢，但係原來一個人坐喺監控室裡面係好彷徨㗎！

唉，考個督導證又要筆試、又要實操、又要設備故障檢查仲有無領導小組，到時都唔知點算。