今日同阿姬約咗出嚟見面啦，我哋一齊喺新市墟百信廣場二期嗰間九毛九食咗餐飯。佢個人都幾多嘢講、幾好傾啊。

食完飯行出嚟嘅時候咁啱見到佢堂大佬同堂嫂，跟住阿姬就跟咗佢哋走啰。

新年嘅氣息越嚟越濃，但係唔知點解我覺得越嚟越冷清。

今日站裡面組織聚餐，喺崗貝路口附近嗰間聚匯坊，唔知係唔係啲人講嘅“尾牙”呢？

本來好唔想行過去崗貝嗰邊，但係偏偏嗰一帶就只有崗貝有嘢食、有嘢買，雖然唔情願，但係上夜班都係經常去嗰邊買嘢食。唉，有時真係覺得個天喺度玩我。

因為今日參加嘅人數唔多，所以公司啲領導打算23號嗰日先過嚟參與，但係噉樣我哋反而覺得無咁拘謹。

喺食飯嘅過程裡面我哋同每一圍嘅員工都敬過酒啦，平時唔會八八卦卦噉刺探人哋私隱嘅我今日都知道咗好多嘢。良哥仔準備年底結婚啦、周相公同佢女朋友亦都已經領咗證、同老婆一樣係獨生子女嘅伯伯又準備生第二胎……雖然自己過得嘛嘛、乜都唔順心，但係有時聽下人哋講哩啲嘢都幾“鄧”佢哋開心。

PS.

　　食完飯收到表妹條微信，佢話我份在職證明唔夠規範，一定要用有紅色字印住公司抬頭嘅紙打出嚟先有效，因為工作證只係僅供參考，如果無紅頭文件嗰份在職證明嘅話可能辦唔到簽證。如果唔得嘅話就要返去求公司再開一份啦。

　　唉，希望唔會影響到今次期待已久嘅日本之行啦。我成年年假都擺曬落今次旅遊度㗎啦！

　　19號係表妹生日，請我食蛋糕。我咁大個人第一次食Häagen-Dazs，感覺無想象中咁好食。怕者嗰種味道就好似表妹同佢男朋友噉啦——甜到“漏”啊！

　　有時覺得，“情人眼裡出西施”真係講得一啲都無錯。原來表妹喺佢男朋友眼裡面係噉㗎喎！

　　表妹將幅畫貼上朋友圈嗰陣仲喺度“大大滴幸福喲~”。唉，肉麻到令人妒忌。

　　而我亦都即將迎嚟自己第39次相睇啦，個女仔姓黎、叫阿姬，望崗人，喺龍歸永興村一間公司做銷售會計。唔知佢係點嘅呢？期待得嚟又有啲忐忑。真係好想快啲搵到嗰個人、快啲結束哩段咁漫長咁折磨人嘅相睇之旅啊！

踏入2014年以嚟嘅第一次相睇，同上次一樣，係個媒人俾咗電話之後我哋私底下通過短信約出嚟嘅。個女仔叫阿琴，87年，住喺嘉禾，喺一間公司做男裝特賣。

今日本來佢約我喺廣百門口等嘅，但係我喺北京路嗰個門口、佢就去咗西湖路嗰個門口，最後都係要電話聯繫。

第一次見面，佢著住一件咖啡色嘅外套，企喺廣百嗰間工行嘅門口等我。

跟住，我哋去咗動漫星城食飯。食完飯經北京路同惠福西路兜咗一個圈之後就送佢去廣衛路搭車啦。成個過程都表現得唔係好自然。唔知點解，硬係覺得相睇嘅感覺好怪。

我阿媽成日同我講：“有咁上下就好啦！”叫我唔好太揀擇。其實都有道理嘅，但係唔知點解，一聽佢噉講我就覺得俾佢哩句話砸到透唔到氣。

曾經，我喺微博上面對泉仔嘅婚姻表示“恨死隔離”嘅時候，佢回覆我話：“我有预感 好快到你噶啦. 咁我就又有机会做兄弟 影相啦!”

唉，談何容易啊？

或者真係好似我回覆佢嗰句話噉樣：“如果我結婚一定搵你做兄弟。不過直覺話我知你嘅預感唔啱。”

有時惗下真係好搞笑，連兄弟都有埋啦，但係新娘唔知喺邊。

其實，人哋開解嗰時經常用到嘅“隨緣”，只係“望天打卦”嘅另一種俾人感覺豁達啲嘅講法嚟啫。