第51次相睇，喺美華一樓嘅133號檯，個女仔叫阿婷、好似住喺嘉禾、86年。
之前我阿媽突然間同我講起細個嗰時住喺阿婆隔離屋經常同我玩嗰個勇仔，真係唔講我都唔記得原來以前仲有個噉嘅朋友。勇仔已經結咗婚囉，娶咗個瑤台妹，仲去咗澳洲發展添。阿媽話佢老婆有個妹仲未結婚，惗住介紹畀我識。本來個女仔話乜都無所謂，最緊要人品好就得啦。個介紹人拍曬心口保證我人品絕對好。但係後嚟都係見唔成面，因為個女仔話唔鍾意我做哩份工，結果就連相睇都慳返。
之前何生曾經離開咗公司幾個月，後嚟先聽講原因竟然係“女朋友覺得哩份工無出息”，過咗兩個月先申請返嚟繼續做，結果搞到嗰年又無年終獎又無雙糧，連年假都無得休，最後仲同條女散埋添。當時好不以為然，做哩份工確實無出息，但係因為女朋友覺得無出息而辭職始終覺得有啲憨居。唉！雖然話“行行出狀元”，但係職業同人一樣，永遠都係分三六九等嘅。性格、人品、心地哩啲嘢喺職位、前途、階層面前，顯得幾咁蒼白無力。
曾經聽人講過：如果喺一間公司、喺一個崗位上面努力咗三年都無乜建樹就應該考慮轉工。惗落都有道理嘅，好似小強，入職三年就升督導，而我，努力咗三年連督導證都未考到，其實真係有啲氣餒。正如何生所講，哩份工雖然穩定，但係無前途。如果有門路嘅話真係唔會喺哩度踎，但係咁大年紀已經無咗當年唔想做就走嗰種灑脫，已經無咗裸辭嘅勇氣，就好似泉仔，辭職之後足足一年都搵唔到嘢做，當初日日除咗食飯、瞓覺之外就係發咗癲噉投簡歷嗰種同等死無區別嘅生活真係惗起都驚。而用人單位知道你仲未離職嘅話，根本連面試嘅機會都無……
不過好在，聽講何生同佢女朋友已經攞咗結婚證啦，雖然之前一直兜兜轉轉、離離合合，最後都係大團圓結局。
又一對戀人修成正果囉，唔知幾時輪到我呢？
