第二次嚟伊度相睇，我先發覺原來伊條街啲招牌都好好意頭嘅：聯富大廈、華興隆超市、名揚海鮮肥牛火鍋、廣福百貨、福之源百貨……同埋今晚食飯嗰間順景大排檔。唉！如果個老闆知道有個咁多阻滯嘅人嚟幫襯伊間以“順景”命名嘅大排檔，唔知仲會唔會歡迎呢？

今晚相睇嘅對象姓李、叫阿文、陳田人，好似係87年出世嘅。

現代人離開咗網絡真係好似與世隔絕噉，通過Q群同朋友圈先知：原來江凱欣結咗婚、何生亦都已經結咗婚、陳妹生咗8斤重嘅BB仔、良哥仔升咗做監控中心值班副主任……最近一排真係發生咗好多好事。唉，可惜。

熱鬧是他們的，我什麼也沒有。

——朱自清《荷塘月色》

醫院因為床位緊缺而拖咗咁多日，老竇聽日又要入院啦，開始第二個療程嘅化療。雖然佢表現得好堅強，每逢有人嚟探佢都好似無件事噉同人有講有笑，又話自己做完化療之後精神同胃口都好咗好多，仲想周圍出去行下添。但係自從知道咗有伊個病以嚟，我覺得佢好似憔悴咗好多、突然間老咗好多。

阿媽話，老竇好想親眼睇住我成家。

唉！其實，我都好想。