我好清楚噉記得，我嘅生日係7月16號、農曆六月初十，但係我已經唔記得我有幾多年無慶祝過自己嘅生日。無人知道、無人記得、我自己亦都唔想提。

唔知由幾時開始，我好驚一啲大時大節嘅嚟臨。元旦、農曆新年、清明、端午、中秋、國慶、聖誕節，仲有自己嘅生日，每當哩啲日子一次又一次噉經過嘅時候佢哋都似乎喺度提醒我：一年又噉就過咗去啦。亦都唔知由幾時開始，我喺經歷哩啲日子嘅時候，心情從原來嘅“又大一歲”變成“又老咗一歲”。總之我好記得，細個嗰陣自己對生日係好期待，唔似而家噉覺得有一種莫名嘅恐懼。

唔驚唔覺就廿七歲啦，如果三十歲唔結婚真係要判刑嘅話，我仲有1096日嘅時間可以為自己洗脫罪名。但係，1096日，喺茫茫人海裡面搵一個人已經唔容易，更何況係搵一個可以兼且愿意同你廝守終身嘅人呢？

企喺三車道，睇住顯示器下面嗰行數字從“　2013-07-15　23:59:59　”一下子跳到“　2013-07-16　00:00:00　”，嗰種感覺好奇妙，哩個世界所流逝嘅極其普通嘅一秒，對於我嚟講似乎有種好特別嘅意義。十二點接X03之前我仲係26歲，一點半關道嘅時候26歲已經離我而去。

2013年7月16號，我人生中第27個生日，無人記得，自己一個人喺站房裡面寫落哩篇日誌。而1096日嘅期限，亦都已經喺幾個鐘之前開始倒數。唔知喺我第28個生日會唔會有人陪我過呢？如果無嘅話，唔知喺1096日嘅期限裡面，我可唔可以搵到一個噉樣嘅人呢？

希望喺下一個大時大節嚟臨嘅時候，我唔會再感到恐懼同彷徨，而係可以同一個人一齊分享節日嘅開心同喜悅。