又係一年嘅11月14號。

其實伊個日子無乜咁特別，但係唔知點解我總係會不自覺噉惗起。

今日落早班之後專誠去上下九食咗碗面，喺地鐵裏面見到有個女仔覺得好似佢。

最近聽講宮﨑 駿導演獲得奧斯卡終身成就獎，於是我忍唔住睇咗一次《千與千尋》。唔知點解，我竟然覺得嗰隻カオナシ身上似乎有自己嘅影子，尤其是佢沉默噉企喺雨夜望住燈火通明嘅“油屋”嗰一幕，我覺得カオナシ同自己特別相似。一個人孤零零噉睇住人哋嘅熱鬧、無人留意到自己、無人在乎自己嘅感受、每日都要帶住一副笑嘅面具……カオナシ咪就係我囉？

自己嘅言行舉止、意識同觀念都同現今嘅社會格格不入，曾經唔只一次傻奸奸噉覺得，自己根本唔屬於伊個年代，只係唔知點解會生活喺哩個自己根本適應唔到嘅時空。

唔知我係唔係喺投胎嘅時候唔小心誤闖咗一個自己根本唔應該進入嘅世界呢？前世嘅事我一啲都唔記得，可能我已經畀湯婆婆改咗名囉！唔知我以前係叫咩名嘅呢，我以前生活嘅世界又係點嘅呢？