噚晚，我阿媽去祠堂食飯，打包咗好多餸返嚟畀我哋食。本來一家人樂也融融，但係唔知點解，我阿媽突然間話覺得阿英個微信頭像好鶻突，睇到佢起曬雞皮，叫佢換一個。

阿英唔肯，話“你覺得鶻突咪唔好睇囉”。

跟住咪又有好戲睇囉，唉！我阿媽雖然無乜文化，但係講嘢真係好有水平，一開口絕對可以激到阿英“戥戥”聲走返入房——其中最精彩嘅一句，原話係點我已經唔記得，總之言下之意就係只有畜生先會攞畜生嚟做頭像。

唉，失驚無神又嚟一鑊。我阿媽伊種咁喜怒無常嘅性格話翻面就翻面，真係心血少啲都嚇死。結果本應一家人共聚天倫嘅快樂時光又搞到不歡而散。

不過慣囉，啱啱結婚嗰陣我阿媽就曾經同阿英講過：一家人點樣嘈都唔緊要，有乜嘢講曬出嚟大家先可以有商有量，乜都鬱喺個心度唔出聲、成日你估我我估你反而唔好。其實佢無惡意嘅，就係脾氣比較暴躁囉——就正如我同阿英講：我老母把口衰啲啫，其實個人無乜嘢嘅，同其他老母或者家婆相比，佢對我哋已經算好好㗎喇。阿英都同意我嘅講法、都知道我阿媽好多時鬧佢都係想佢好，但係就係唔中意人哋乜都加把口嚟管住曬。唉，對於伊啲不可調和嘅矛盾，我都無辦法。

如果一個家庭可以好似一隻陀錶運作得咁協調咁完美、家庭成員之間可以好似機芯嘅各個零部件一樣配合得咁天衣無縫，噉樣你話幾好呢？

PS：

無幾耐之前，聽講表姐買咗部車——未見過、亦都唔知係乜嘢車，都係聽講啫。其實幾年前——我老竇重喺度嗰時佢就叫我買部車，得閑多啲返鄉下，因為嗰度先至係我嘅根，但係當時我不置可否。

唔知點解，最近越嚟越多人——靈姐、耀丹、Uncle周、宏業……個個都問我點解重唔買車（真係唔明老婆就嚟生同買車有乜嘢關係）。我話無錢，點知一隻二隻都唔信。

對於我嚟講，返鄉下拜年同拜山、探伯爺同阿叔佢哋、接送阿英返嘉禾、休息去周邊啲城市玩下、過年前去車啲桃花同桔仔返屋企……其實有部車真係好方便。但係調返轉頭諗下，我哋伊個地段交通都幾發達啊，村口就有個車站、行多幾步路又有地鐵，邊度都去得到，買部車擺喺度又好似無幾何用得著。而且，一個月得嗰幾千蚊工資，點樣買至得㗎？再講啦，人哋話“買車容易養車難”，後續嘅花銷先至係無底洞。

我阿媽雖然唔讚成買車，但係我知道，只要我話想買，佢一定會畀錢我買。只係，我覺得無噉嘅必要啫。

車又唔係生活必需品，自己係點樣嘅人咪過點樣嘅生活囉，無必要同人攀比啲乜嘢。喺無本事買車嘅時候，行多兩步路無壞啊。