曾經喺網上睇到有一個男生三年經歷88次相睇嘅新聞，佢喺嗰三年裡面每逢節假日都無做過其它嘢，唯一嘅安排就係相睇，有時甚至一日走幾場。當時覺得好不可思議：三年落嚟一共相睇88次，到底係咩概念呢？

睇嚟，我一啲都唔需要少見多怪，自己相睇嘅次數已經踏入“五”字頭。對於好多人嚟講，可能已經係一件惗都唔敢惗嘅事。

第50次相睇，喺萬達嗰間江山•享味嘅K02號檯，個女仔姓尹、叫阿瓉、住喺嘉禾（聽講好似係尹邊）、喺農林下路一間兒童攝影店做銷售。

今日係寒露，前幾日開始就已經有啲涼意。今日有一句話喺新浪微博俾人瘋狂轉載：“你已經過完2014年所有的法定假日。”其實做得哩份工，我對節假日嘅感覺已經越嚟越麻木，但係睇到哩條微博我仍然覺得不知所措。今年過年嗰陣“馬上有錢”、“馬上有對象”、“馬上行大運”一類嘅祝福仍然歷歷在目，但係唔驚唔覺馬年已經接近尾聲囉，時間真係快到得人驚，而年頭“馬上有對象”嘅祝福怕者亦都會落空。

仲有55日，我嘅相睇生涯就持續咗足足四年啦，喺哩四年裡面，世界盃嘅賽場由南非去咗巴西、亞運嘅聖火由廣州移到仁川……儘管外面嘅世界每時每刻都發生住翻天覆地嘅變化，但係我嘅世界依舊一成不變，感情狀況仍然係單身。

由第1次到第50次，我用咗三年十個月零八日。回顧哩幾年，感覺時間一眨眼就過，但係仔細回憶，我又真係連自己都好難想象哩50次相睇係點樣捱過嚟嘅。

唉，一年又差唔多咗去啦，唔知我係唔係真係要追平人哋88次嘅紀錄呢？