2010年12月2號，我搭上咗一趟列車。

停靠咗35個車站，見到無數形形色色嘅人喺我身邊擦肩而過，到今日為止已經足足三年啦。

喺哩三年裡面，親眼睇住一個又一個乘客喺哩趟列車上上落落，每當有一個乘客即將上車我都會祈望佢嘅出現就係我哩段旅程嘅最後一站，但係事實已經第35次令我失望。

唉！演慣咗人哋生命中一個微不足道嘅過客，我真係好想扮演一次某個人最終嘅歸宿；做慣咗人哋旅程中一個匆匆掠過嘅中途站，我真係好希望自己可以有機會做一次某個人情感征途嘅終點站——真係一次就夠嘎啦！

睇住哩趟列車一次又一次噉埋站，睇住一個又一個乘客抱住同我一樣嘅憧憬上車、最終又得償所願噉落車，就只有我一個憨居居噉期待住列車下一次埋站、期待住下一位乘客上車，至於終點站，仲係遙遙無期。

2010年12月2號，我搭上咗一趟列車，到今日已經足足發車三週年、經歷咗35站里程。我唔知自己幾時先可以到達終點，我凈係知道，哩段旅程真係好漫長、令人好彷徨。

即將到嚟嘅第36站，你會唔會係哩段旅程嘅終點站啊？