醫生話，雖然結果未出，但係兩項重要指標都符合，所以基本上可以確定老竇個病，所以今日就開始做化療。

老竇知道咗自己嘅情況之後表現得好平靜，但係我見到佢幾次藉住攞毛巾抹面嚟抹眼淚。醫生同好多人都話最緊要放鬆心情，開朗啲、樂觀啲去面對。唉，伊個世界永遠無話“感同身受”，安慰人哋就好地地，真正發生喺自己身上就完全唔係噉回事。

聽阿媽同阿叔佢哋講起，關於懷疑有惡性腫瘤嘅事，其實老竇喺正骨醫院嗰時啲醫生就話咗俾佢知，只不過佢一直瞞住我同阿媽。老竇仲同姨丈佢哋講：我個人太單純、唔夠獨立，最擔心我搵唔到女朋友，然後先閉翳自己。

原來，人好容易就會流眼淚。由細到大我經歷嘅逆境同挫折已經夠曬多，但係我從來未試過咁驚、咁無助，除咗眼白白噉睇住佢瞓喺度吊針，根本乜都做唔到。

唔知氣溫真係降咗定係心理作用，原來唔單只係我，連阿媽都覺得伊兩日真係凍咗好多。