噚日，第一次同阿玲去街。原本我係休息㗎，但係點知因為全線啲卡箱都要盤點，唔夠人手，臨時排咗夜班俾我上。而且天公不作美，臨出街先落鬼咁大雨。
唔知係唔係因為阿玲經常中意捱夜呢？雖然打咗好厚粉，但係我睇得出佢啲皮膚唔係幾好。
因為唔係好夠時間，所以凈係喺北京路嗰間萬歲食咗啲嘢就走囉。
兩個人都唔係好識講嘢，雖然我已經盡曬力惗話題，但係好似都無講過幾多句。
但係唔知點解，阿玲似乎對我嘅過去好感興趣，一直問我之前相睇過幾多次之類嘅問題。
送佢返到巷口，佢話唔使再送，佢自己返去就得。睇住佢轉入條巷，唔知點解，我覺得有啲傷感。
《變形金剛》又準備上啦，仲記得三年前第三集上畫嘅時候我係同一個女仔去新市百信廣場嗰間電影院睇嘅。而家，嗰個女仔已經嫁作他人婦，連仔都有埋囉。三年，乜都變曬。當年我一直以為佢會陪我一直行到最後，但係后嚟先知原來我只係一廂情願噉以一條備軩嘅身份發住真命天子嘅夢。
今年嘅《變形金剛》，我會自己一個人去睇！
PS.
上完一個夜班之後，瞓咗一日又要去開工囉。連上兩個夜班真係好辛苦。
唔知點解，哩幾日做嘢覺得特別辛苦，連續幾日落哩真係好攰。今日仲要咁早起身，去到鬼咁遠飲餐茶，下晝仲要開工，其實真係唔係幾想去㗎。不過，無辦法啦。
第46次相睇，地點係上次周記隔離嗰間嘉麗一樓嘅A08號檯，個女仔姓李、喺一間美容院做前台。
記得6月7號，啱啱高考嘅第一日，婷婷生咗個仔，雖然佢調過嚟無幾耐，而且佢長駐新城、我之前就一直喺新市，所以同佢唔係咁熟，但係我都好為佢開心。睇住個群裡面成個屏幕都係“恭喜”“恭喜”……其實我真係好羨慕。
唉！唔知我會唔會有哩一日呢，唔知到時啲同事會唔會好似對婷婷噉樣為我送上祝福呢？
記得兩年前嘅今日，我同一個女仔去花城匯嗰間UA睇咗場電影、喺體育東嗰間萬歲食咗餐飯。跟著就無咗下文。佢叫張蕾，係我第17個相睇對象。
唉，噉就兩年啦，唔知佢而家點呢？
我仲記得兩年前佢同我講過，佢想同佢老竇去日本旅遊。今年，我已經去完日本返嚟啦，唔知佢去咗未呢？
今年，我仍然喺相睇嘅路上尋尋覓覓、跌跌撞撞，唔知佢搵到自己嘅Mr Right未呢？
老實講，我真係唔知自己哩兩年係點過嘅。兩年后嘅今日，我迎嚟自己啲45次相睇。
喺祥景花園附近嗰間周記黃石店嘅4號檯，個女仔叫阿霞、住喺棠溪、喺屋企四姊妹裡面排行第三。
又係一次無結果嘅相睇。
上個月28號嗰晚我喺新城上夜班，見到斌少車住條女喺車道經過，唔驚唔覺佢辭咗職都有幾個月囉，無見一排嗰條死仔變到滿面春風，同我打招呼嗰時仲鬼咁風騷。望住佢部車越開越遠，唔知點解，我覺得有啲失落，但係又忍唔住會心一笑。雖然佢唔願意俾我見到條女係咩樣，但係條女身材幾好㗎。唉，我無啫，見到人哋有都覺得開心嘅。
失魂魚準備升督導啦，聽講佢仲準備年底結婚添；良哥仔好似又係年底結婚；周相公已經休完婚假返嚟；連斌少有女朋友囉……
今年食啲同事派嘅花生同喜糖都食到牙痛。其實我都想派喜糖俾啲同事食㗎！
到咗哩個年紀，過年已經唔稀罕同事啲利是，咁大個人，佢哋派利是俾我我仲覺得唔好意思添。唉，過年過節，我都好想派利是俾人啊！唔知派利是嘅感覺係點嘅呢？真係好想試下。
如果我都可以快啲搵到對象就好囉！
