2015年嘅第二個月份先過咗六日，但係今晚已經係我今年嘅第四次相睇。個女仔姓黎、叫阿君、87年嘉禾望崗人、喺元下田嗰邊做輔警、佢好似係我伯爺個孫個老師個姪女。

喺百信廣場嗰間麥當勞飲咗杯嘢，喺九毛九食咗餐飯，跟住送佢去車站。

以前每當相睇完一次我都忍唔住會鬆一啖氣，但係今晚我無。

聽阿媽講，醫生話嗰啲化療藥物對老竇完全唔起作用，仲話估計只剩返半年。聽到之後我真係心都涼曬，一下子好似連僅存嘅一啲希望都無埋。

阿媽話俾姨媽知，佢曾經講笑噉問老竇驚唔驚，老竇話唔驚。唉！其實有乜理由會唔驚？一個無辜嘅人突然間俾上帝判咗死刑，仲要眼白白噉瞓喺病床上等住死期嘅到嚟，嗰種滋味可想而知。佢話唔驚只係唔想我哋擔心啫。嗰日我送飯去俾老竇同阿叔食，老竇同我講咗好多嘢，講下講下佢又忍唔住流眼淚——喺厄運面前，“堅強”兩個字顯得幾咁脆弱。

我最記得老竇話，如果我懂事、真係幫得佢手嘅話，佢早就發咗達。但係曾經好長一段時間，我一直都認為：如果我老竇係李嘉誠，我絕對唔會差過李澤楷。

之前咁多年，到底係我唔理解我老竇，定係我老竇唔理解我？

伊啲係唔係就係所謂嘅“代溝”呢？

新市墟向來都好旺好熱鬧，臨近過年啲氣氛更加喜慶——間間商店唔係播《財神到》就係《恭喜恭喜》。原來，現實生活同連續劇係完全唔同嘅，當不幸降臨嗰陣，唔需要有傷感嘅配樂、唔需要有悲痛嘅氛圍，淚水一樣會喺眼裡面打轉。

阿媽話，事到如今唯有睇下有無奇跡，如果老竇可以飲到我杯茶就最好。

半年……