噚晚上夜班，一過咗12點打開支付宝就顯示“Happy Birthday”同“生日快乐”嘅字樣出嚟，京东重一次過送咗七張券畀我添。跟住農行、天河城、“广天”……陸陸續續都發祝福嚟。其實喺我嘅習慣上，今年7月11號夜晚11點就已經踏入六月初十嘅子時，生日早就過咗，但係我對伊啲“垃圾短信”一啲都唔覺得煩，畢竟伊個日子就淨係得佢哋記得。

今日生日，不過唔係幾快樂。

太多嘢惗、太多嘢要煩。唉！婆媳矛盾嘅夾心餅真係痛苦，夾喺中間左右為難、兩面不是人。其實，喺男人嘅角度睇嚟，矛盾好易解決、甚至根本就唔應該發生矛盾——凡事多啲忍讓、多啲理解、互相遷就、互相體諒，其實好多矛盾都可以避免嘅，但係一旦到咗現實裡面往往就唔係咁簡單。好多時覺得，阿英並唔係喺伊個家庭長大，佢係一個有獨立人格有自主思想嘅人，無理由要佢乜都就曬我阿媽；但係反過嚟要我阿媽乜都就曬佢，噉又似乎更加無道理。其實有好多嘢根本就無話邊個啱邊個錯嘅，只係觀念唔一樣同埋生活習慣唔同啫，但係佢哋就非要分個是非黑白、孰是孰非、誰對誰錯。尤其是我阿媽同阿英：一個控制慾強，乜都要管、乜都要理、乜都要人哋按足佢講嘅噉樣嚟做；一個又過分有性格，乜都唔中意人管、乜都唔中意人理、甚至有少少人哋建議噉樣我就偏偏唔噉樣嘅叛逆心態。長此以往，有乜辦法唔無事生非、小事化大？而且，伊啲唔知係唔係女人嘅通病：我阿媽成日話我以前好聽佢講嘅，而家就乜都聽曬阿英話；阿英又話我乜都聽曬我阿媽話，十足十就係“妈宝男”一個。唉，我真係唔知自己可以點。人哋話“唔做中、唔做保”，其實我好想從中調解一下，但係根本無從入手。怪只怪自己當初，我阿媽中意到乜嘢噉嗰啲女仔我一個都睇唔上眼啦——我阿媽中意嗰種類型清一色係闊口大面、腰圓膀粗、肥尸大隻，可惜我唔中意嗰種類型，所以我唯有經常同自己講：“ 伊啲嘢抵我受嘅！ ”如果當初可以“聽媽媽的話”，或者而家自己都唔會咁受傷。

算囉，好多嘢都係一言難盡，唔講囉。

不過農曆生日嗰日，阿英就話想陪我出去食飯——係瞞住我阿媽嘅。

佢喺微信問我想食乜，我話隨便點個飯就得，不過唔要上次佢點嗰個燒肉飯，於是佢幫我點咗個“蜜汁叉烧五宝饭”，佢知我中意。

佢自己就點咗個“咋咋淋”套餐，其實佢唔中意套餐陪嗰個魚湯，但係就係中意食牛扒。

兩個人就食咗成嚿水，廣州嘅消費水平真係泊得住香港，但係收入就未有耐追到人哋。

最近一直想買一套古龍——雖然網上有好多免費資源，不過如果有得揀，我都係比較傾向於正版。

本來伊個價錢都勉強可以接受嘅，但係睇“顾客评论”，佢所謂嘅“古龙作品集”根本唔全，楚留香系列淨係得《楚留香新传》，差咗《楚留香传奇》幾部，而且折扣打得最犀利嗰時（2017年12月）只係賣￥4.99，又覺得唔係好值。

仲有，自從知道“万千百货”有個Hamilton嘅專櫃之後一直想去睇下，今日終於有時間，又上網查路線又睇導航兜咗一大個圈，去到先知所謂嘅“万千百货”原來就係“万达”，くそ！

寫伊篇日誌嘅時間係7月9號凌晨、星期二，但係因為隻手錶嘅日曆唔係瞬跳，所以顯示重係星期一。

今個月阿英入職滿一年，申請到三日年假，連埋週末一共可以休到五日，於是我都申請七月底休年假，惗住同佢一齊去旅遊。

其實行程喺年頭就開始計劃：一開始阿英話想去法國，但係當時法國有暴亂；後嚟我喺微信群睇到一篇關於郵輪嘅軟文，覺得幾唔錯，提議搭郵輪落南洋，但係阿英上網搜咗下話價錢都幾貴；跟住佢話想同我去多次泰國（佢之前已經去過兩次），但係醫生唔建議佢搭飛機；噉我問佢去蘇杭好唔好，佢話已經去過杭州西湖，費事去多次；跟住佢又想去重慶，但係無幾耐之前四川又有地震，我擔心重慶會受到波及；我又話不如去北京啦，佢又嫌就算搭高鐵一來一回都已經無咗兩日，而且佢之前都已經去過北京；討論來討論去，本來最終係決定去上海嘅，但係佢聽到個閨蜜話千島湖好靚，又改變咗主意——之前又係佢自己話已經去過杭州嘅，閨蜜嘅威力真係巨大。不過我又無乜所謂，反正都係休年假出去玩啫，杭州咪杭州囉。

可惜，始終都係去唔成。阿英一開始就覺得我阿媽唔會畀佢去，因為佢而家大住個肚，我重以為佢太多心添。佢一直催我問下我老母先，點知真係畀佢估啱咗。唉！無辦法啦，行程唯有取消。

其實，已經係噚日（7月8號）中午嘅事。

一如既往，我阿媽講下講下就扯咗去第度借題發揮、重越講越激動，面對住我阿媽伊種血統純正嘅“好好说话会死星人”，我全程一聲都唔敢出，由得佢講、由得佢鬧。唉，出面嗰啲八婆一撞到就不懷好意噉截佢問幾時抱孫，我都知係好煩嘅，我喺站裡面咪一樣係噉？唔啱聽嗰句當聽唔到咪算囉，真係唔明佢點解咁嬲。嗰啲“看熱鬧不嫌事大”嘅八婆咪就係想激嬲你等佢哋有嘢睇啫嘛，點解要中佢哋下懷？

唉，算啦。阿英話休年假嗰幾日佢返嘉禾喎，叫我自己搵節目。失望肯定失望啦，就係唔知佢有無嬲。

PS：

美度新出嗰隻指揮官真係好靚，灰盤橙針——唔知點解，我好中意噉樣嘅配色。

哦，重有，今日見到好多無車牌嘅白色“广汽传祺”經過，全部喺機場過嚟嘅，司機清一色係警察，小胖重話見到好多部車裡面都有一個制服警花陪住個領導，應該幾大粒下。開班前會嗰時先知原來今日公安部有好多人落咗嚟開會討論應對突發事件，唔知係唔係我多心呢？估計香港嗰邊嘅事態會進一步升級。

當年，我阿公身體唔好，成日要住院。為咗幫輕下屋企嘅負擔，我阿媽14歲就輟學去工廠做嘢——最記得佢講過：早上重返緊學，中午返到屋企阿公阿婆話而家未夠年齡都收喎，“哦！”就噉樣，佢下晝即刻放低個書包就去返工。

唔知係出於傳統嘅習慣定係當時嘅潮流，佢開始上班無幾耐阿公同阿婆就送咗隻手錶畀佢——一隻手動上鏈嘅機械錶，舊年佢畀咗我。

到而家我都唔知到底係乜嘢牌子，淨係依稀睇到“上海钟表拉丝”嘅字樣（好似係），應該係國錶。

雖然係國產嘢，但係質量非常之好，喺嗰個物質極度匱乏嘅年代，好多嘢就算有錢都未必買到——乜都要票，甚至要託人搭關係，但係嗰時啲嘢嘅用料、做工真係比而家良心好多。

對於手錶，可能我哋而家講究得更多嘅係瑞錶嘅血統、德錶嘅韻味、或者日錶嘅性價比……但係似乎都唔及老一輩心目中對國錶嘅嗰份情懷。

我阿媽隻錶從來無攞去做過保養，但係幾十年嚟都無乜事，唯一嘅問題就係每逢落雨錶盤裡面都會有一層水霧。阿英嗰隻鐘錶王國嘅來路嘢就差得遠囉，買咗先半年左右——嘖嘖，這個粗手粗腳的敗家娘們！（畀佢知道我喺背後噉樣講佢肯定又嬲）

今日我阿媽話佢自己一個去睇住團長就得，唔駛我去，於是我就攞阿英隻手錶去睇下到底咩事。

接待我嗰位小姐得出嘅結論係：“無乜嘢大問題。”但係……睇到個報價都唔知整唔整好。

想當初，喺澳門打完折再折返人民幣先四千幾。唉！無辦法啦，唔通唔整咩？

跟住去幫阿英買個藍牙鼠標，本來佢已經喺淘宝落咗單，後嚟嫌人發貨慢又退咗貨，叫我幫佢去實體店買。電腦用品專賣店伊家嘢，通常唔需要嘅時候就感覺周圍都係，一旦需要買嘢奉旨搵唔到。去北京路嗰間“新联 ”問過，淨係得蘋果原裝嘅鼠標，但係之前阿英嫌原裝嘅太貴，所以我就去廣百嘅微軟專櫃買——雖然無蘋果原裝嘅咁貴，但係都要￥278。

買完去食嘢嘅時候發現一樓嗰間勞力士專賣店關咗門，唔知係裝修定執咗。其實，就算執咗笠，某種程度上我覺得都係必然嘅事——租咁大個店面，裡面十個八個櫃全部空寥寥，喺北京路伊啲寸土尺金嘅地方都唔知佢點樣賺錢嚟維返條數，而且啲店員又老閪，一個個唔瞅唔睬當你無到，同對面嗰間Omega真係無得比。

重有，前嗰排表哥去俄羅斯旅遊，帶咗塊朱古力返嚟畀我。從來無食過俄羅斯嘅朱古力，唔知味道點呢？睇起身好似幾唔錯。