自從上次之後，好耐都無再相睇過啦。一嚟年紀越嚟越大、合適嘅相睇對象就越嚟越難搵，二嚟係因為前嗰排公司好多嘢要做，又換系統又更新設備準備七月份全省聯網，而且今年以嚟走咗好多人，公司招人嘅速度遠遠唔及啲舊同事辭職咁快，招嚟招去始終都仲係唔夠人手，加班加到我怕啊，班表改完又改，相睇嘅事就唯有一推再推。

好奇怪，啲媒人搵唔到合適嘅相睇對象嗰陣我好想佢哋快啲幫我搵到，但係當佢哋約我去相睇嘅時候我其實又唔係幾想去。

就好似今日，我連續上咗咁多日班，真係好攰，但係收工之後我仲係要跟住阿媽準時赴約，進行我人生第44次相睇。

今晚相睇嘅地點係三元里嗰間美華，1樓175號檯，個女仔叫潔兒，住係夏茅。

又係一次未開始就估到結果嘅相睇、又係一次無結果嘅相睇。其實我真係好懷疑：我一次又一次噉跟阿媽去相睇，相睇哩段漫長嘅經歷會唔會為我結出一個哪怕唔係太大、唔係太甜嘅果實？我又要用侷促嘅冷汗同辛酸嘅淚水喺哩條路上灌溉幾多個春秋先至可是收穫哩個果實呢？下晝收工之前，就連何生都話我噉樣去相睇法係唔會追到女嘅。但係除咗噉樣我又可以點呢？

喺母親節嗰日，聽到我阿媽打電話周圍求人哋介紹對象俾我識，我真係覺得好心噏。唔知點解，嗰晚我瞓喺床上面一直喺度流眼淚，其實我真係好驚，但係到底驚啲乜嘢，連我自己都講唔清楚。

第44次相睇已經過咗啦，我知道第45次好快就會嚟到。但係唔知屬於我自己嘅嗰段緣分幾時先到呢、我到底可唔可以喺自己嘅有生之年等到嗰個人出現？