人哋話久病成醫，唔知相睇嘅日子耐咗係唔係都可以成為一個好叻嘅媒人嘅呢？如果係嘅話，怕者我都會係能醫不自醫。唉，媒人都已經識咗五六個囉，但係老婆就硬係搵唔到一個。

已經有一年幾無同阿齊姨飲夜茶囉，上次同佢介紹嘅女仔相睇已經係前年12月21號嘅事，今次相睇又係喺三元里大道嗰間東江。年幾無嚟，今晚發現東江門口嗰塊LED顯示屏一直循環滾動住“社会主义核心价值观：富强、民主、文明、和谐……”嘅字樣，嗰一排紅色嘅大字，就同喺相睇期間刻意嘅表現一樣咁虛偽。

人生嘅第54次，又係一次一無所獲嘅相睇，個女仔姓盧、叫阿華、蕭崗人。

繼達龍兄之後，Tiger兄都準備結婚啦，啲婚紗相影得好靚。中石化果然人工高福利好，Tiger兄已經唔係當年嗰個窮學生囉，高大靚仔又有本事。婚紗相裡面嗰對新人郎才女貌，真係睇到都覺得羨慕。

因為日日都要開工，而且工作壓力好大，自從老竇入院開始做第二個療程嘅化療以嚟都未去睇過佢，阿媽叫我聽晚帶飯去俾佢同阿叔食喎。老竇已經做咗兩日透析啦，透析嘅具體情形阿媽真係講得好恐怖。我好擔心啊，真係好希望佢可以好返。