七日假期，阿英返咗兩次娘家，不過我重嫌佢返得少添；今日又去咗番禺探佢個朋友，今晚返唔返嚟食飯都未定——唉，由得佢啦。同我阿媽見少幾面未嘗唔係好事，就算係賭王嗰幾房姨太之所以幾十年都咁和睦無非都係建立喺隔離嘅基礎上啫。

前幾日，我阿媽如常八點準時喺微信掛號——又係掛何教授，但係唔知點解一直付款唔成功，由八點一直斷斷續續掛到十二點都唔得。我以為佢唔識，幫佢試咗幾次，一係就付款唔成功、一係就提示話唔可以重複掛號。眼睇住啲號越嚟越少，佢就越整越心急、越整越嬲，兼且粗口連連。

第二日，我上早班，屋企淨得阿英同我阿媽兩個人。阿英喺撈肉餅嘅時候覺得嚿肉餅同啲冬菇太大嚿、只碟仔又太細唔好撈，於是換咗隻兜嚟撈，食完飯可能急住出嚟接我收工，又唔記得洗。

結果等我哋返到嚟之後我阿媽就喺度單單打打，話以前佢同老竇從來無話去接對方收工嘅、都係邊個早收工就返屋企整好啲嘢先，如果唔係根本無飯開。跟住又扯到阿英中午撈肉餅係要換隻兜嚟撈、撈完又唔洗、搞到佢要洗多隻兜。講講下重越鬧越難聽，話阿英“變態”、話我“千揀萬揀揀著個爛燈盞”、“自己個仔搵著伊隻癲雞真係前世唔修”……唉，洗多一隻兜啫，駛唔駛噉講嘢啊？雖然越鬧越離譜，但係我一籌莫展，因為當時我根本唔知發生咩事，唔通叫我老母收聲啊？咪唯有由得佢鬧囉，我就無乜所謂，反正由細到大都畀佢鬧慣囉，只係擔心阿英頂唔順搞到矛盾升級，好在佢一直喺房裡面無出聲——事後先話我知，佢好幾次想沖出嚟鬧返我阿媽，但係一惗到我平時對佢咁好又忍住，睇在我份上唔同佢嘈，只係自己喺間裡面嬲到踢檯踢凳——其實我早就留意到佢平時坐開嗰張酸枝椅啲榫頭已經鬆咗出嚟，唉！

高中學《孔雀东南飞（节选）》講到焦仲卿畀老母逼住休咗劉蘭芝嗰時阿潘就曾經講過，自古以嚟中國嘅婆媳關係都係比較微妙嘅，當時無乜概念，直到結咗婚先有深切體會。唔知今時今日婆媳矛盾引致嘅婚姻破裂佔咗幾大比例，如果以後我真係要走到伊一步嘅話，怕者就佔咗其中一例。

阿英唔止一次私底下提出話要我哋兩個搬出去住，我都唔知點辦，唯有一味敷衍佢話等個細路出咗世先算。唉，我阿媽點會同意？再講啦，要佢一隻老嘢孤零零噉自己生活，事實又係好可憐嘅。

阿英話佢唔抵得我哋關係咁好所以專登畀說話我哋聽，重話佢係“戀子狂”，一日到黑要黐實個仔、咁大個都唔肯放手，搞到我乜都唔識又無啲主見、成個“妈宝男”噉；其實，我覺得佢只係因為前一晚掛唔到號，揾啲嘢鬧下嚟發洩啫，無咁誇張。

阿英成日話希望肚裡面嗰個係仔，唔係因為重男輕女，而係一嚟佢覺得生個女出嚟肯定會畀我阿媽嫌棄、甚至會逼佢生二胎，二嚟唔想個女大個之後嫁入一個我哋噉嘅家庭、遇到我阿媽噉嘅家婆，生個仔就唔駛受伊啲委屈。佢重提議個仔結婚之後畀佢搬出去住、畀足私人空間佢哋、唔好下下管住曬。唉，講係噉講啫，一個人由細到大、由後生到老，心態係會變嘅，點知佢“媳婦熬成婆”之後會唔會真係好似自己預計嘅咁開通？就好似，曾經我好奇怪點解出面班八婆咁中意攪屎棍、乜人哋嗌交真係咁好睇咩？後嚟惗深一層，當年《溏心風暴》晚晚家嘈屋閉，我咪一樣追得咁歡？有口話人無口話自己，有時換個角度惗下，其實好多嘢都唔係咁難理解。

一講起TVB好自然就惗到香港，無幾耐之前林鄭月娥宣佈撤回《逃犯條例》，我以為件事會就噉告一段落，點知另外4項訴求唔接納，跟住又搞個乜嘢《禁止蒙面規例》出嚟，結果繼續行街。聽講包括中國銀行同中國移動在內嘅所有中字頭店鋪都遭到打砸，真係越玩越激。

一直以嚟，本來成件事我都係以隔岸觀火嘅心態嚟了解嘅——本來就事不關己，勢估唔到把火居然有朝一日會燒到埋嚟我伊沓。

繼9月1號所有學生都要睇《开学第一课》、家長重要按老師要求影相發朋友圈之後，連我伊件已經走出校園多年嘅老餅都無法倖免，公司要求下載一個叫“学习强国”嘅app嚟日日“學習”領積分，學唔夠積分就扣分（扣分即係變相扣錢），同志們學習嘅熱情相當高漲——工資本身就唔多，有乜辦法唔高漲？

不過惗深一層，其實又唔怪得啲領導，上頭有政治任務壓落嚟，公司啲領導都係負責下達文件精神啫，總之形式主義嘅流程就係噉樣走。對於伊啲實際上好無謂但係理論上又係必須嘅嘢，公司領導唔見得就比我哋基層嘅員工更加樂意接受。

PS：

前日小學同學聚會，地點係乐嘉路红叶酒店嗰間佰福荟，2樓鸿福房。其實搭車都幾順路，但係我無去——次要原因係要開工，主要原因係我唔想去——連我自己都唔知點解。

啲女仔依稀重係當年嘅模樣，但係啲男嘅好多都唔認得囉——除咗肥強、何Ｂ仔、阿翔同超記之外，其它都已經叫唔出名——唔係唔記得佢哋個名，而係……個個都唔係發福就老態初現，啲樣完全變曬。重有，林老師真係老咗好多。

唉，畢咗業咁耐，各有各嘅成長同變化、各有各嘅經歷同人生際遇，就算再聚埋一齊，都已經唔再係當初嗰個具有凝聚力同班級榮譽感嘅集體囉，不如就等當年啲同學仔永遠留喺記憶裡面啦。

小學６年，好感謝有你哋嘅陪伴。