안녕하세요.两年前嗰个冬天我问你除咗英语之外仲有无学其它外语，你就同我讲咗一句噉样嘅话，一直今日我都记得好清楚。嗰时你仲问我点解咁中意打繁体字，我净係话繁体字好靓，并无太深入噉解释个中原因。
已经两年几啦，我一直同自己讲我已经放低咗，可惜仲係不由自主噉留意到伊个日子。
我仲记得今日係你生日，但係我已经连同你讲一句“生日快乐”嘅资格都无。
咁耐以嚟我一直都忍唔住想去再睇返你个微博，但係又一直都唔敢。
唔知你揾到嗰个令你倾心相许嘅오빠未呢？怕者你已经结咗婚啰，係咪呀？分手嘅时刻就好似一条新嘅起跑线，昔日嘅情侣开始暗地里较劲：相睇、物色新对象、拍拖、结婚••••••马不停蹄之余又好好奇对方目前嘅状况，都想抢喺对方前面同第个人步入殿堂，以此嚟证明一啲莫名其妙嘅嘢、满足嗰种连自己都捉摸不透嘅所谓“尊严”。虽然明知伊种隔空嘅攀比係无谓嘅，但係总係乐此不疲。我唔知你而家过得点，但係我觉得自己输咗啰，输得好彻底。
离开咗校园，记性太好其实真係唔係一件幸福嘅事。有啲嘢原本可以由佢随时间流逝、慢慢离自己远去，但係偏偏喺伊个日子我仍然想起你，仍然记得今日係你嘅生日。不过好可惜同你一齐过嘅人唔係我，我甚至连同你讲句“生日快乐”嘅借口都搵唔到。
或者，你早就已经唔记得我啰。我喺你嘅生命里面只係一个无谓人。
어쨌든, 당신 생일 축하합니다!