可能係心理作用啦，一直都覺得萬達嘅風水唔係幾好。因為唔知點解，先後有幾個女仔，原本同佢發展得好地地嘅，但係一去完萬達之後，無過幾日就即時玩完。所以我得閒就算真係唔知有乜嘢地方好去都唔會去萬達嘅。

但係阿珊偏偏就揀咗萬達作為我哋第一次見面嘅地方。

2014年4月4號，我人生第42次相睇，個女仔姓黎、叫阿珊、86年、望崗人。

我哋喺萬達三樓嗰間綠茵閣食咗餐飯，今次坐嘅係205號檯。食完飯之後喺沃爾瑪行咗一圈就走啦，佢話聽日要去拜山、想早啲瞓。

我哋一齊去搭地鐵，但係佢係返嘉禾嗰個方向、我係去三元里嗰個方向，所以我等佢入咗地鐵先走。

雖然我都唔係幾啱心水，但係睇住佢搭上嘅嗰部地鐵開入黑暗嘅隧道，我竟然有啲傷感。

唉！我知道，我同佢唔會再有第二次見面。

我哋，只係彼此嘅人生中一個匆匆嘅過客。