個女仔姓黃、叫阿杏、普寧人、喺我以前間中學隔離嗰間小學做老師。

佢老竇幾健談嘅，不過我同佢就無乜嘢講。

每次相睇唔成功，我阿媽經常都會唉聲歎氣，一係怪我表現唔好、一係怪我眼角高，甚至懷疑我加入咗邪教組織俾人洗咗腦、因為信教而專登唔搵對象。

唉，唔單只佢血壓高，其實我壓力都好大。

相睇咗咁多次，其實我對相睇真係已經絕望。但係無辦法，做得伊份工，交友圈子咁細，除咗相睇之外根本無任何其它渠道。

唔知點解，屋企個熱水器最近成日都死火，每日起碼要重新開佢幾次先可以沖完個涼。雖然好麻煩，但係望住部熱水器，我竟然有啲同病相憐嘅感覺——伊部唔驚唔覺已經用咗成十年嘅熱水器就好似唔驚唔覺差唔多相睇咗十年嘅我同異性嘅關係一樣，撻極都唔著、一著就熄。

人哋話失敗係成功之母，好好奇點解甘多個老母都孕育唔出一個唔會夭折嘅後代？第58次失敗就意味住被迫面對第59次嘅到嚟。

我唔知道伊段旅途有無總站、而家離終點仲有幾遠，不過我知下一站好快就到。

對於相睇，我已經開始由疲憊變成恐懼。

上完一個Ｓ班落嚟，收工之後仲要去同一個陌生嘅女仔食飯、應酬、寒暄……嗰種感覺，真係好攰。

其實，我真係唔明山西九毛九有乜咁好食，但係好多女仔都好中意。

今晚，第57次相睇，地點又係百信廣場嗰間九毛九。個女仔姓何、叫阿珍、86年、喺政務中心嗰邊一間物管公司做文職。

曾經聽人講：二十出頭係男人一生之中嘅最低谷，而女人卻正處於一生之中最美好嘅年華，如果有一個女仔喺伊個時候願意留喺你身邊、陪你一齊挨窮、一齊奮鬥，你一定唔可以辜負佢，因為，佢將自己一生之中最青春嘅時光獻咗俾一生之中最落魄嘅你——男人，絕對唔可以棄糟糠！

仲有四個月就踏入二字頭嘅最後一歲啦。好遺憾，伊個女人一直都無出現過。喺成長嘅過程當中，我聽過好多夫妻相處之道，但係始終搵唔到一個可以夫妻噉樣相處嘅人。

每當過完年之後都會有好多人辭職，今年都唔例外。連小小強都走咗啦，不過，佢臨走前都喺公司搵返個對象，真係唔可以唔佩服佢。點都好啦，人往高處走，希望佢喺聯通可以有更加好嘅前途——同埋，同蘿莉可以早日修成正果。

賢弟，加油啊！