相睇咁多次，印象中今晚好似係第一次遲到，仲要遲咗成個鐘。

本來約好今晚六點嘅，但係我阿媽記錯咗17號，搞到六點鐘先出門口，去到都成七點囉。

今晚見面嘅地點係齊富路嗰間龍都酒樓，個女仔姓龍、叫阿婷、87年、好似係喺區政府做嘢嘅。

之前曾經牢騷性質噉同阿媽講過，唔想再睇。反正都單身咗咁多年啦，容乜易就一世？我從來唔相信嗰啲乜嘢“總有一個人在等著你”之類嘅話，男女比例咁懸殊，有啲人係註定孤獨終老嘅。唔知係唔係俾我嚇親呢，自從嗰次之後我阿媽就唔敢再催我。

雖然無之前咁大壓力，但係其實我真係唔係幾想再睇。睇過咁多個，如果相睇真係有用嘅話怕者早就得咗囉。

但係，除咗噉樣，又可以點呢？

曾經有一個女仔批死我哩一世都要靠相睇嚟搵老婆。唉！而家睇嚟，如果靠相睇可以搵到老婆就好囉。