唔驚唔覺就初七啦，時間過得真係快。雖然按照傳統要到十五之後先算過完農曆新年，但係一般嚟講初七初八啲人就要開工啦，高速公路亦都踏正十二點開始收費。

今晚，咁啱又係夜班。

自從做咗哩份工之後我已經兩年唔喺屋企過年，但係我阿媽唔會好似其他父母噉，知道仔女返唔到屋企過年就表現得好失望、好幽怨、好唔開心，佢反而開解我： “唔緊要啦，過年同平時都係一樣噉過嘅啫。等你得閒再煮返啲好嘢畀你食啦，最緊要畀心機做嘢。”我聽咗之後雖然覺得好不是滋味，但係無辦法啦。雖然過年都 要開工，但係已經比之前嗰份工好好多囉。2010年我喺吉之島駐場嗰陣根本連休都無得休，大年初一睇住人哋一家大細出嚟行街，雖然吉之島嘅人氣好旺，但係 自己感覺好孤單。當時有一個沙特人用好唔標準嘅普通話同我講咗句“靚仔新年快樂”之後我就忍唔住流眼淚。

不過今年已經好過之前嗰兩年好多啰，起碼年卅晚可以喺屋企過，年初二又唔知開工，就係年初一要上個夜班。

初四去咗探妗婆，舅公啲孫已經好大個啰，當年我同表妹爭住抱嘅嗰啲小朋友而家都長成高富帥。有時覺得祖先真係好偏心，大家都係佢嘅後代，舅公啲孫個個都米八幾、鬼咁靚仔、名牌大學畢業，而且家底豐厚，又有股份分又有屋租收，我就一副純種屌絲嘅款。

每逢過年，無論有親戚嚟坐定係去人哋屋企拜年都係一次次身心俱疲嘅煎熬。喺閒談寒暄之餘，總要面對啲親戚各種各樣嘅提問。自己嘅細路讀書叻嘅，肯定會問人 哋考試考成點；自己啲仔女搵到份好工嘅，肯定會問人哋喺邊度做嘢、工資待遇點；自己啲仔女有對象嘅，肯定會問人哋有無男女朋友、幾時結婚……總之，只要睇 下一個人講啲咩話題、問人哋乜嘢，就知道佢喺邊方面撈得特別好——至於自己都嘛嘛地嘅嘢肯定唔會主動攞出嚟講。不過對於最近微博上討論得最多嘅哩種“中國 式親戚”，我又唔會太過反感，畢竟可以令自己引以為豪嘅嘢梗係想搵機會講出嚟同人分享㗎啦。而且，無理由因為噉樣就認定人哋有惡意啩？與其話嗰啲“中國式親戚”喺提問之餘藉機曬命，我更加願意相信佢哋真係關心我、為我著緊。

嗰日我仲跟住我阿媽同姨媽去參觀咗舅父佢哋間新屋。成二十層樓咁高，整片城區盡收眼底。哇！噉嘅景觀、噉嘅視野，真係無得頂！

初六嗰日波波搵我調班，我去咗白雲新城嗰邊上。收工嗰時已經十點幾，因為我實在唔想去崗貝路口搭車，所以就行咗去綠地中心嗰邊白雲公園嗰個站搭地鐵。行到地鐵站嘅時候見到有班又係準備搭地鐵嘅女仔邊行邊傾計，其中有一個講咗句：“翠婷噚晚喺微信度同我講‘我同男朋友分咗手啦，大家祝我分手快樂啦’噉喎。”我唔肯定佢哋講嗰個“翠婷”係唔係就係阿婷，但係唔知點解我突然間覺得百感交集，講唔出係咩滋味。初三嗰日上個Ｕ班，同海燕仲有何生三個人喺入口傾咗好多關於感情嘅問題。海燕問我：“都快整整一年了，怎麼還這麼癡情？”我話：“我經常跟自己說，我已經放下了，可是到底放下了沒有，我也不知道。”唉，就連無意中聽到一群陌生人嘅一句閒談都可以咁神經過敏。睇嚟，之前我強迫自己唔好再惗佢，話已經放低咗都係自己“呃”自己。

唔知係哩個世界變得太快定係我適應得太慢呢？每當新嘅一年開始之後我都好難接受到上一年已經離開嘅事實，今年亦都唔例外。2013年明明已經永遠唔會再返轉頭，但係我似乎對2013哩個數字仲係念念不忘。整整一個月嘅時間，“2113 2014”都係我喺工作記錄簿、非正常信息表同繳款單上面例牌嘅寫法。但係唔知由邊日開始，我不知不覺噉習慣咗2014，唔會再惗都唔惗就喺日期嗰欄寫“2013”。

原來，2013嘅離去并唔係乜嘢大不了嘅事，只係我需要一啲時間嚟適應哩種改變。2013唔會再返嚟，但係我嘅生活仍然要繼續。我應該做嘅唔係為2013而一直鬱鬱寡歡落去，而係以當初對待2013嘅態度去珍惜2014。

哩個道理我明，我亦都希望我可以做得到！