好長一段時間無去過美華，今晚先知原來美華喺過年前重新裝修過，聽講一樓租咗俾人，淨係留返二樓。

今晚，250號臺，相睇對象叫阿苗、86年、喺龍洞嗰邊一間銀行做嘢。

又係一次無結果嘅相睇，唉！

最近一直都想去睇《臥虎藏龍2》，但係一直都去唔成——唔係因爲無時間，衹係，唔知點解，自從阿婷對我嘅態度突然間變曬之後（我唔知同佢算唔算係開始過，所以亦都唔知叫唔叫“掟煲”），我做乜都提唔起興致。

聽日又要開工喇——三月第一日上班。三月份嘅人員調動得好犀利：啲領導知道咗達少同小麗拍拖之後就將佢調咗去黃石——公司雖然允許有雙職工，但係唔知點解，情侶同夫妻唔可以喺同一個站；劍爺借調咗去平沙；梁敏靜調咗去蚌湖。啲熟絡曬嘅同事就係噉樣調嚟調去，又要重新認識一啲陌生嘅同事，不過噉都好嘅，過年嗰陣我應承過梁敏靜今年之内結婚、出年派利是俾佢個仔，雖然衹係講笑，但係調走咗佢起碼唔使顯得我食言。

噚日小小强同蘿莉都發朋友圈話去香港，本來都無乜點在意，后嚟睇到佢哋發合照先知原來係一齊去㖞。今日又去咗迪士尼，玩得好開心。其實迪士尼我08年就去過，今日睇到佢哋喺迪士尼影嘅相同拍嘅視頻，同當年相比好似一啲都無變——無非都係嗰幾種機動游戲、花車巡游、烟花匯演……不過今日嘅佢哋同當年嘅我雖然同樣喺香港迪士尼，但係心情同處境真係截然不同。一齊去香港，仲要過埋夜，估計感情應該都發展得好穩定喇啩？真係好羡慕佢哋，希望佢哋可以早日修成正果啦。

之前站裡面嗰啲鬼咁哈韓嘅僆妹經常反復噉聽一首歌——成首歌由頭到尾我淨係聽得明一個單詞：Loser。但係唔知點解，伊首曾經令我覺得好煩嘅歌最近一直喺我部電腦裏面循環播放——雖然唔知佢哋唱乜，但係“I’m a loser”伊句我仲係聽得明嘅——聽落真係好有代入感。

唉，我自己衰啫，都想人哋好嘅。

賢弟，加油啊！