相睇得多，唔知係越哩越有經驗定係越嚟越麻木呢？

記得第一次去相睇之前，我阿媽專登帶我去飛咗個髮、我老竇忍痛攞出佢香港嗰個表姐送嘅西鐵城俾我帶——嗰隻手錶連佢自己都唔捨得用，一直收埋喺柜桶裡面，保存的好好嘅。印象中我老母仲封咗兩封利是俾我，祝我順順利利。總之，第一次相睇真係搞到好隆重。

但係，今晚我嘅第43次相睇，我已經完全無曬當初嗰種忐忑、拘束同謹慎，甚至已經無曬相睇嘅感覺。反正就係去見個面、食餐飯，就咁簡單。

今次個女仔姓劉、叫阿苗、86年、住係彭邊、喺體育西做嘢，而我同佢嘅晚餐就選擇咗喺正佳三樓嗰間必勝客嘅12號檯。

唉！食嘢之餘，傾幾句噉囉，反正唔抱乜嘢希望。

今晚同阿苗一共食咗171蚊，返到屋企我阿媽係都要俾返錢我。同其他父母唔同，我老母從來都無對我提出過按月交家用之類嘅要求，好多時反而仲會俾啲錢我添。

唔知點解。睇住我阿媽放喺書檯嗰300蚊，我真係講唔出咁心酸。

曾經，我一度埋怨父母。以前我同女同學通個電話佢哋都審犯咁審，而家就怪我唔點樣識同女仔溝通；以前一味千叮萬囑“唔好拍拖”、“唔好早戀”，而家就催喉催命……點解唔可以由得我順其自然？

唉，年紀大咗就唔會再有怨天尤人嘅餘地。

阿媽俾嗰300蚊，我會好好地收埋佢。以後，如果有機會嘅話，我會同某個人講返哩300蚊背後嘅嗰個故事。

當我喺E03嗰裝緊卡嘅時候，有個女仔行過嚟問我借手機，講完仲專登遞佢部iPhone過嚟畀我睇，個屏已經完全裂曬。個女仔好靚、身材好高挑、好有氣質，但係我見到佢面上仲掛住淚痕。半夜三更突然間有個人喺部發卡機後面轉出嚟，當時真係嚇咗我一跳。我同佢講，我哋上班係唔可以帶手機嘅，佢又“對不起”又“謝謝”講咗一大輪先至抽泣住轉身離開。
佢一直行到隔離嗰間新邦物流嘅門口我先見到仲有個男人坐喺門口嘅樓梯度。佢喺嗰個男人身邊坐低之後就開始同佢嘈，唔知因咩事個男人仲開始打佢添。可能部iPhone就係喺佢哋拉拉扯扯嘅時候整爛㗎啦。
好耐之前聽波波講過佢喺接入口嗰時嘅一段見聞：有個男人要趕住去機場搭飛機，佢女朋友死都要攔住部的士，流住眼淚當眾跪喺佢面前求佢唔好走。講到最後，波波顯得好感慨：“個女仔生得幾靚㗎，身材仲好好添。唉，嗰個男人都唔識珍惜嘅！”聽完之後我半信半疑，淨係喺度笑。估唔到今晚同樣都係喺入口就畀我見到哩一幕。我真係好難相信、好難想像有人會噉樣對自己女朋友。雖然已經兩點幾，路上無乜人，但係當街當巷都可以對女朋友咁粗暴，你話喺私底下會點呢？
檢查好曬啲設備之後，我一直望住佢哋喺對面拉拉扯扯，心情真係矛盾到極點。我好想過去勸阻，但係唔知點解一直都無勇氣。
好奇怪，雖然畀男朋友又打又鬧，但喺個女仔似乎點都離唔開佢，嘈下嘈下又攬埋一齊，甚至瘋狂激吻。真係令人費解。睇住佢哋最後上咗部的士走咗，我仍然覺得好難受。
喺哩三年半嘅時間裡面，我一直幻想有朝一日可以通過相睇嚟覓得真愛，但係原來我根本唔知乜嘢係“愛”。
“問世間情為何物”，情情愛愛哩啲嘢真係好難理解。
就算遇到阿Sam咁成熟穩重嘅好男人，余春嬌一樣放唔低張志明；無論尚優優幾咁溫柔體貼善解人意，張志明最後都係選擇返餘春嬌。
點解？恐怕連余春嬌同張志明自己都唔知。
就好似點解嗰個女仔寧願忍受男朋友嘅拳打腳踢都無勇氣離開，怕者連佢自己都唔知一樣。
一年幾之前，我以為只要自己一心一意噉樣為感情付出，阿婷就會永遠留喺我身邊。但係事實上哩啲嘢係無得勉強嘅，愛情唔係科學，唔可以用力嘅原理嚟詮釋。當我對一個物體施加50N嘅壓力，佢同時都會對我施加50N嘅反作用力。但係，我好中意一個女仔，佢唔一定都會咁中意我；我對一個女仔好好，佢亦都唔係事必要領情。
愛情唔係科學，無道理可講、無規律可循，甚至無人可以講得清佢到底係乜嘢。但係，好多人都受盡佢嘅折磨，終其一生都得唔到解脫。
唉！問世間，情為何物？

可能係心理作用啦，一直都覺得萬達嘅風水唔係幾好。因為唔知點解，先後有幾個女仔，原本同佢發展得好地地嘅，但係一去完萬達之後，無過幾日就即時玩完。所以我得閒就算真係唔知有乜嘢地方好去都唔會去萬達嘅。

但係阿珊偏偏就揀咗萬達作為我哋第一次見面嘅地方。

2014年4月4號，我人生第42次相睇，個女仔姓黎、叫阿珊、86年、望崗人。

我哋喺萬達三樓嗰間綠茵閣食咗餐飯，今次坐嘅係205號檯。食完飯之後喺沃爾瑪行咗一圈就走啦，佢話聽日要去拜山、想早啲瞓。

我哋一齊去搭地鐵，但係佢係返嘉禾嗰個方向、我係去三元里嗰個方向，所以我等佢入咗地鐵先走。

雖然我都唔係幾啱心水，但係睇住佢搭上嘅嗰部地鐵開入黑暗嘅隧道，我竟然有啲傷感。

唉！我知道，我同佢唔會再有第二次見面。

我哋，只係彼此嘅人生中一個匆匆嘅過客。