踏入2014年以嚟嘅第一次相睇，同上次一樣，係個媒人俾咗電話之後我哋私底下通過短信約出嚟嘅。個女仔叫阿琴，87年，住喺嘉禾，喺一間公司做男裝特賣。
今日本來佢約我喺廣百門口等嘅，但係我喺北京路嗰個門口、佢就去咗西湖路嗰個門口，最後都係要電話聯繫。
第一次見面，佢著住一件咖啡色嘅外套，企喺廣百嗰間工行嘅門口等我。
跟住，我哋去咗動漫星城食飯。食完飯經北京路同惠福西路兜咗一個圈之後就送佢去廣衛路搭車啦。成個過程都表現得唔係好自然。唔知點解，硬係覺得相睇嘅感覺好怪。
我阿媽成日同我講：“有咁上下就好啦！”叫我唔好太揀擇。其實都有道理嘅，但係唔知點解，一聽佢噉講我就覺得俾佢哩句話砸到透唔到氣。
曾經，我喺微博上面對泉仔嘅婚姻表示“恨死隔離”嘅時候，佢回覆我話：“我有预感 好快到你噶啦. 咁我就又有机会做兄弟 影相啦!”
唉，談何容易啊？
或者真係好似我回覆佢嗰句話噉樣：“如果我結婚一定搵你做兄弟。不過直覺話我知你嘅預感唔啱。”
有時惗下真係好搞笑，連兄弟都有埋啦，但係新娘唔知喺邊。
其實，人哋開解嗰時經常用到嘅“隨緣”，只係“望天打卦”嘅另一種俾人感覺豁達啲嘅講法嚟啫。
今晚收工返到屋企，見到牆上面已經換曬新挂曆啦。
2014，好陌生嘅一個數字。
曾經，對於2013，我都有哩種感覺——寫咗足足一年嘅2012，突然間變咗2013，嗰種感覺真係唔係好慣。但係經過一年嘅時間慢慢適應咗2013哩個數字之後，佢又離我而去啦，取而代之嘅係一個當初同佢一樣咁陌生嘅2014。
其實，喺生活中好多嘢都係噉。包括喺繳款單上面寫日期，亦都包括相睇之後同一個女仔交往。
世界末日之後嘅第一年一轉眼就過咗啦，但係我嘅世界并無迎嚟乜嘢新紀元，同2012年相比一啲區別都唔，事業、感情，乜嘢都喺度原地踏步，唯一變咗嘅就只係我又老咗一歲。
今年我真係過得好唔開心，似乎成年裏面嘅所經歷嘅就只有相睇、相睇、相睇……回顧我嘅2013年，我一共相睇咗15次，對象遍佈荔灣、嘉禾、蕭崗、夏茅、石井、三元里、鶴邊、大朗同桂花崗，但係仍然唔知我一直尋覓嘅嗰個人喺邊，甚至根本唔知我生命中到底有無一個噉樣嘅人存在。
聽講，前年喺我阿媽為咗我啲嘢一籌莫展嘅時候，有個媒人安慰佢：“緣分未到啫，等緣分一到好快就成事嘎啦。”
曾經聽人講，如果有個女仔（尤其是你中意嘅女仔）問你相唔相信緣分，你一定要話相信。因為女仔大部份都係迷信嘅，如果你唔信緣分佢就會覺得同你無共同語言。
以後當有一個女仔真係噉樣問我嘅時候，可能我都會話相信。但係，實際上緣分係乜嘢，邊個講得清？有時惗下，“緣分”真係一個好好開藉口，區區兩個字可以解釋曬一切聚散離合——開始，係因為緣分；結束，係因為有緣無分。就好似“際遇”，區區兩個字可以敷衍曬人生所有高低起伏——資質平庸但係可以飛黃騰達，因為人生際遇；空有本事但係無用武之地，又係因為人生際遇。
如果話有一首歌由17歲唱到27歲都一樣咁應景嘅話，噉哩首歌肯定非《１８７４》莫屬。
有時真係好難理解，點解喺文學上會有“飽受相思之苦”哩種講法。可能係嗰啲分隔兩地嘅情侶身在福中不知福啦，我從來都唔認為相思係一種煎熬，反而係心靈上一種近乎奢侈嘅享受。
兩情若是久長時 又豈在朝朝暮暮
有人同自己彼此相思，噉樣咪就係一種幸福啰？嗰種感覺係幾咁溫暖、幾咁甜蜜，點會同苦楚扯得上關係呢？
日積月累之下，越嚟越顯漫長嘅相睇之路已經踏入第四個年頭啦，今晚係我三年零十九日以嚟嘅第37次相睇，地點係三元里大道嗰間東江，今晚我哋坐嘅係+C15號檯，個女仔姓謝、叫阿霞，住喺匯僑嗰邊。
今日喺微博上睇到一條新聞：
34岁李小姐参加同学婚礼，席上，唯一单身的她受到冷嘲热讽，在酒精作用下，她签下脱单生死状，誓言2014年前结婚，并用手机下单购买2000瓶喜酒（15.6万元）！日前,她接到电话，2000瓶酒已发货……经协商，商家知道她是“酒后乱买”，答应退货。
雖然依舊單身，但係原來我并唔孤獨。
真係好想同嗰位李小姐互勉：加油！千祈唔好氣餒。
之前同一個女仔發過幾晚短信、通過一次電話，今日終於約佢出嚟食咗餐飯——喺五號停機坪，中午十二點。個女仔姓黎、叫阿儀、86年，嘉禾望崗人，喺新市附近一個小區嘅居委做嘢。聽佢講，佢好鍾意食有咖喱風味嘅越菜嘎。
雖然之前通過電話同短信傾過幾句，但係見面之前一直都好忐忑，我根本唔知佢係一個點樣嘅女仔，而我第一眼見到佢係喺五號停機坪嘅7號門，如果無記錯嘅話，嗰時係中午十二點二十四分。
十個月之前，我可以講係喺五號停機坪跌低嘅，我真係好希望自己可以喺五號停機坪哩度企返起身，真係好希望過咗今日之後，自己對五號停機坪哩個地方唔會再有陰影。
2013年12月7號，我同佢第一次見面。今日佢著住一件綠色嘅長袖“冷衫”同一條黑色嘅短裙、揹住藍紫色手袋、攔住一件深藍色嘅長褸。
今日係第一次，唔知會唔會係唯一嘅一次，仲會唔會有下一次呢？拭目以待！
五號停機坪 2013.12.07
無意中發現喺一個文件夾裡面仲有今年過年前公司喺堂會聚會嗰時影嘅相，真係唔知係咩滋味。唔驚唔覺噉就差唔多一年啦，時間真係過得好快，十個月前嘅嗰次聚會感覺就好似只係無幾耐之前嘅事，但係哩十個月真係發生咗好多事，回想起嗰時嘅自己，又覺得好似好遙遠。
唉，如果哩一年裡面乜嘢變故都無發生你話幾好呢？
五號停機坪嗰間堂會，似乎係我哋站聚會嘅首選，我嚟咗哩間公司之後，連續兩年嘅年會都喺嗰間堂會搞嘅。
嗰日啲相係劍爺影嘅。良哥仔同劍爺都係攝影發燒友。我曾經親眼見過黃生成個背囊都裝滿曬鏡頭，劍爺部單反更加係專業得好誇張。
師奶大我兩年，但係佢個仔都讀緊小學啰。
芬姐對自己個仔向來都感到好自豪，不過佢上半年辭咗職啰。
高鐵一家三口。
娟姐同佢個仔。我真係好希望終有一日我都可以攜眷出席公司嘅年會啊！
梁站向來都好親民。
紅姐，黃生同佢改咗個花名叫“你最紅”。
蘇老闆都嚟唱埋一份。蘇老闆同我同年嘅，凈係大我一個月，但係人哋已經算係領導啰。
村姑同花花都辭咗職啰。
何生成日話同女朋友瀕臨分手，其實都不知幾恩愛。
阿映細我兩年，但係人哋05年就入職啰。
小強個仔幾可愛。
個個都叫你做黑妹，其實都唔係好黑啫。
劍爺當時係負責團委工作嘅，佢唔單只係攝影發燒友，而且仲係《紅樓夢》發燒友添。不過佢調咗去蚌湖之後就無見過面啰。
村姑係一個富二代，成身名牌。
大方調咗去三元里，大半年無見啰。
華哥曾經代表新市去參加集團嘅比賽，可惜連佢都走埋啰。
曾經有傳言話團長同珍珍拍拖，我仲以為係真嘅添。後嚟團長都調咗去三元里啰，喺三元里仲攞埋先進個人添。
失魂魚，聽講佢同我一樣都差異得好犀利，不過后嚟先知原來佢啲差異根本未有耐夠我咁多。
劍爺個女朋友，當時劍爺已經認定佢係未來嘅伍師奶嘎啦。唔可以唔講，劍爺真係好鬼有福氣。
聽講江小姐同佢男朋友仲有何生同佢女朋友經常四個人一齊約會，可憐我就一直孤零零。
唔知幾時開始有咗“賴屎”哩個花名，真係冤枉。
蘇老闆係唱得之人。
喺機場調過嚟嘅菜空心，靚女！
劍爺話菜空心最無儀態嘅一面俾佢發掘咗。
小茹喺玩遊戲嘅時候俾人感覺有啲侷促。
我記得舊年11月波波啱啱入職嘅時候我有一晚帶佢上個夜班，嗰晚差異咗80蚊。唉！
好多人都話斌少同我好似，但係我又真係唔覺喔。
小美又係上半年辭職嘅，因為哩份工太辛苦喔。
微姨升督導之後調咗去三元里，但係聽講連佢都辭埋職啰。
有好多曾經好熟悉嘅同事，可能以後都唔會有機會再見面啰。唔知係唔係回憶中嘅日子總係特別美好嘅呢？短短十個月之前，我每一日都過得好開心、工作好有衝勁，惗落我已經成十年未試過好似當時咁積極樂觀、對未來充滿咗希望。唉，如果事情發展得好似期望中咁順利，無發生後來嗰啲唔開心嘅事就好啦！
雖然人喺感到彷徨、迷惘嘅時候總係會回憶返過去發生嘅事，但係做人始終都要向前望嘅，唔發生都已經發生咗，過咗去嘅事咪由得佢過去啰，有啲嘢係永遠都改變唔到嘅，我可以做嘅只有接受同面對。
唔驚唔覺2013年已經凈返一個月都唔夠啦，仲有個幾月就係農曆新年，希望出年嘅年會我會過得同今年一樣咁開心、咁有幸福感。
2010年12月2號，我搭上咗一趟列車。
停靠咗35個車站，見到無數形形色色嘅人喺我身邊擦肩而過，到今日為止已經足足三年啦。
喺哩三年裡面，親眼睇住一個又一個乘客喺哩趟列車上上落落，每當有一個乘客即將上車我都會祈望佢嘅出現就係我哩段旅程嘅最後一站，但係事實已經第35次令我失望。
唉！演慣咗人哋生命中一個微不足道嘅過客，我真係好想扮演一次某個人最終嘅歸宿；做慣咗人哋旅程中一個匆匆掠過嘅中途站，我真係好希望自己可以有機會做一次某個人情感征途嘅終點站——真係一次就夠嘎啦！
睇住哩趟列車一次又一次噉埋站，睇住一個又一個乘客抱住同我一樣嘅憧憬上車、最終又得償所願噉落車，就只有我一個憨居居噉期待住列車下一次埋站、期待住下一位乘客上車，至於終點站，仲係遙遙無期。
2010年12月2號，我搭上咗一趟列車，到今日已經足足發車三週年、經歷咗35站里程。我唔知自己幾時先可以到達終點，我凈係知道，哩段旅程真係好漫長、令人好彷徨。
即將到嚟嘅第36站，你會唔會係哩段旅程嘅終點站啊？
喺鶴邊工業區一間工廠做會計嗰個姓彭嘅女仔以去東莞出差做藉口拖咗一個星期之後，又要繼續踏上相睇嘅路程啦——我人生第35次相睇。今晚相睇嘅地點係棠溪嗰間點心皇子，個女仔係瑤台人，住喺桂花崗，86年。
為咗搵對象，唔驚唔覺喺咁多次相睇裏面凈係請人食飯都用咗差唔多一萬蚊啰。昔日嘅同學一個個都已經為人父母，越嚟越多年紀比我越嚟越細嘅同事、網友喺Qzone上面貼出結婚相同佢哋啲細路嘅相，父母亦都催得越嚟越緊。每當身邊越嚟越多同事越嚟越頻繁噉問我點解咁大年紀都仲唔結婚嘅時候，我總會用講笑嘅口吻反問：“你又唔介紹個畀我？”除咗噉樣搪塞之外，我真係唔知應該點樣去應對。雖然話每個人都有自己嘅生活，無必要同人比較，但係有時真係好彷徨、好無助。喺茫茫人海當中，唔知我需要歷時幾多年、耗資幾多萬先可以完成哩個尋覓對象嘅壯舉呢？
今晚喺食飯嘅時候，個媒人話國企點都好過私企，起碼正規啲、有前途、有保障，想叫我介紹埋泉仔入去做。其實泉仔嗰間公司都幾好啊，朝九晚六兼雙休、做嘢舒服、上班時間又休閒、有時仲可以偷雞早啲走添，真係唔明點解人人都覺得我哩份工好嘅呢？唉！有苦自己知啦。其實我今日好唔開心，今朝臨落班嘅時候為咗完成上頭派落嚟嘅任務，畀個司機凶神惡煞噉指住嚟鬧，最後肥津出嚟幫口先賣到三張次票，最後個司機仲陰陰濕濕噉喺我耳邊揚言“找一群小混混來整死你”。唉，鬧就我哋畀人鬧，賣次票啲錢就市政袋曬，7×24不間斷輪班，又辛苦工資又低，個個月都有人頂唔順辭職，如果我有本事都唔會喺哩度踎啦，我仲點會介紹泉仔入嚟？
曾經喺QQ對一個女仔感歎：真係唔明點解人哋可以咁順利，拍拖、結婚順理成章、一氣呵成嘅呢？佢同我講：感情經歷無人係順利嘅，每一個人都要經受過無數嘅考驗先至可以修成正果。或者真係啦，家家都有本難念的經，可能人哋經歷崎嶇同波折嘅時候我唔知嘅啫。點都好啦，我人生第35次相睇已經挨過咗啦，我唔知一個相睇過35次仍然搵唔到對象嘅人仲應唔應該對下一次相睇抱有幻想、期望會遇到一個合適嘅女仔。唉，不過望係噉望啦。
今晚，我兩年九個月零十四日以嚟嘅第34次相睇，地點同樣都係三元里嗰間美華嘅一樓，今次我坐嘅係162號檯。
個女仔姓黃、叫阿燕，86年，大朗人，喺花園酒店做電話客服。
其實我對佢并唔抱啲咩希望，因為佢生得仲高過我。就算佢唔嫌我矮，我都未必可以接受。
唔知今次會係我最後一次相睇定只係漫長嘅相睇歷程裏面嘅其中一站呢？我真係好希望可以喺某一次相睇裏面，不經意之間就搵到一個合適嘅女仔嚟結束哩一段感覺好似永遠無盡頭嘅尋覓。
“娘啊，您的兒子發燒發到39度都要押著他去相親，您到底是有多想喝媳婦茶啊？”唔知出于啲咩心理，臨出門口嘅時候我構思咗一句噉樣嘅話準備發上微博，但係我最終都係無發到。或者我真係唔應該怪父母咁心急、逼得我咁緊，只可以怪自己唔爭氣。
我老母經常同我講，佢後生嗰陣凈係相睇過一次，對象就係我老竇。佢成日叫我無好咁揀擇、心頭唔好咁高，但係唔知點解，我就真係咁唔爭氣。
2013年9月4號，我人生第33次相睇，地點係美華一樓嘅132號檯，個女仔姓何、叫阿華，鶴邊人，喺芳村嗰邊一間公司做網站嘅美工。
噉樣嘅飯局，我唔知仲要去面對幾多次。無論點都好，人生第33次相睇終於捱過咗啦，真係好希望喺不久嘅將來我我就可以搵到嗰個人。
仍然倚在失眠夜望天邊星宿
仍然聽見小提琴如泣似訴再挑逗
為何只剩一彎月留在我的天空
這晚以後音訊隔絕
人如天上的明月是不可擁有
情如曲過只遺留無可挽救再分別
為何只是失望填密我的空虛
這晚夜沒有吻別
仍在說永久想不到是藉口
從未意會要分手
但我的心每分每刻仍然被她佔有
她似這月兒仍然是不開口
提琴獨奏獨奏著明月半倚深秋
我的牽掛我的渴望直至以後
當佢發短信同我講覺得我哋“唔係咁夾”、“都係做普通朋友比較好啲”之後，嗰晚我就一直聽住呢首歌。我一直都唔敢相信，有人居然可以聽咗朋友失戀之後發嘅牢騷就決定同自己一刀兩斷。
因為我朋友失戀，所以我要飛咗你——曾經好長一段時間，我一直為呢個“史上最牛分手理由”而耿耿於懷：你朋友失戀關我咩事？俾佢講得兩講你就噉對我。我一直覺得自己“躺著也中槍”，但係隔咗咁耐，換個角度惗下，其實如果佢對我嘅認真嘅，又點會將哩段感情睇得咁兒戲呢？唔知出於啲咩心態，可能佢嗰個失戀嘅朋友真係喺佢面前搬弄是非、煽風點火，但係最終決定嘅都係佢，佢同我攤牌就即係根本已經對我無任何嘅留戀。朋友嘅讒言，只係一個藉口，我根本無咩值得痛心同惋惜嘅。
之前經常聽人講：“情場失意就職場得意。”根本係假嘅，佢離開咗之後，我做嘢一直都心不在焉，第二季度差異嘅額度全站最多；而第三季度，單單係7月份已經差異咗92蚊，兩年以嚟最多嘅一次。我知道唔應該因為私人嘅感情而影響工作，但係我真係唔知點解會成日惗住佢、個心真係好痛。嗰日喺三元里嗰個地鐵站撞到范薇，佢話我瘦咗好多。 我唔知自己係唔係真係瘦咗、亦都唔知係唔係因為佢。我一次又一次同自己講：唔值得為一個噉嘅人流眼淚。你成個瘦曬落曬形人哋係睇唔到嘎，就算俾佢知道你為咗佢茶飯不思、晚晚失眠佢都唔會感動，見到你噉嘅衰款反而仲會慶倖好彩早啲飛咗你。但係唔知點解，自己真係咁唔爭氣。每次搭車經過崗貝，我都覺得個心拿住拿住；每當有司機嚟到窗口前面問我五號停機坪點去，我都會惗起佢，惗起以前同佢去G5行街、食嘢、睇電影嘅日子……唉，人哋有咗新歡都已經咁耐，如果效率高嘅話，可能已經發展到談婚論嫁嘅階段啰，但係我竟然仲放唔低，甚至睇到《少年Pi》同《泰囧》嘅海報都會忍唔住惗起當初同佢去橙天嘉禾睇嘅嗰兩場電影、見到有人揸住部三星都會聯想到當時陪佢去買手機嘅情景。一個人點解真係可以咁犯賤嘅呢？
七夕前一晚，我同我阿媽因為相睇嘅事吵咗一場。咁肆無忌憚噉用眼淚嚟發洩情緒，如果無記錯嘅話，應該係六年三個月零六日以嚟嘅第一次，因為我記得上一次喺佢面前流眼淚好似係2007年5月6號。第二日佢同我講，佢一心只係想快啲幫我搵個伴，無惗過會逼得我咁辛苦。聽佢噉講之後我啲眼淚又一直喺眼入面打轉：我又何嘗唔想快啲搵個人結婚呢？可惜個個女生都話我好，但係無一個中意我。唔知點解，我最近越嚟越唔中意留喺屋企、越嚟越驚面對父母，嗰日收工之後我決定去上下九度過今年嘅七夕，因為上下九唔似北京路、中華廣場、五號停機坪同萬達，我喺上下九暫時仲未有太多唔想惗返起嘅回憶。但係我好後悔喺一個噉樣嘅日子出去行街，喺長壽路個地鐵站經上下九一直行到荔灣廣場，到處都係纏綿嘅情侶、到處都係攬住一大扎玫瑰花嘅女生，睇住嗰一對又一對拖到實一實嘅手，我感覺自己好似同佢哋係喺兩個唔同嘅世界噉樣。如果我同阿婷可以一直交往到七夕嗰晚，唔知有佢陪住去行上下九嘅心情係唔係特別甜嘅呢？
唔知幾時開始，我會有意無意噉俾自己一個又一個期限：2010年2月14號係農曆新年兼西方情人節，唔知喺嗰日之前我可唔可以搵到女朋友呢？2011年11月11號係世紀光棍節，唔知我可唔可以喺嗰日之前搣甩“光棍”嘅頭銜呢？2012年12月22號越嚟越近，唔知我可唔可以喺世界末日之前遇到嗰個人呢？2013年7月16號係我生日，唔知我可唔可以喺27歲之前結束單身呢……似乎之前每到一個期限都係以失望告終，但係今次希望我可以做得到。阿婷係今年2月28號同我攤牌嘅，8月28號就已經足足半年，佢唔會再返轉頭，係時候心淡嘎啦。
希望過咗嗰日之後，崗貝路對我嚟講只係一條普普通通嘅馬路，而唔會因為有一個叫阿婷嘅女仔住喺崗貝路而令到嗰一帶成為我心理上嘅陰影。今日——8月17號，距離2013年8月28號仲有11日，希望我真係可以做得到！
由這一分鐘開始計起春風秋雨間
限我對你以半年時間慢慢的心淡
付清帳單
平靜的對你熱度退減
一天一點傷心過這一百數十晚
大概也夠我送我來回地獄又折返人間
春天分手秋天會習慣
苦沖開了便淡
