曾經好中意張敬軒——一嚟因為佢有才華；二嚟因為佢係本土歌手，接地氣、有親切感，唔似港台嗰啲樂壇巨星，雖然不乏精英同實力派，但係遙不可及。嗰陣我仲讀緊書，好多時返學放學我都會一路行一路唱《My Way》，感覺就好似張敬軒行喺我所身邊。後嚟，佢去咗香港發展，之後感覺就越嚟越疏遠，慢慢就無再關注佢。但係《My Way》嘅歌詞我仍然記得清清楚楚：“小時候受傷有人心疼失落有人安慰，現在遇到困難自己就要學會面對……”其實，伊啲只係好顯淺嘅道理嚟啫。

噚晚，我成晚都無瞓著，轆嚟轆去聽住個鐘由十二點打到七點，就算想閉目養神都覺得心煩意亂，真係唔知點解。搞到自己今日鬼咁攰，仲要上個兩頭班，真係辛苦到咩噉——一共打咗四張廢票，狀態差成噉，好在交數無差異。兩餐飯都唔開胃，倒咗好多。周天傑仲話叫我等佢落班一齊去食宵夜喎，又攰又無胃口，更加無心情，所以推咗佢。好多人問我點解今日面色咁差，我都係一笑置之——無人幫到你，都係自己面對算囉。

收工嘅時候，睇到安安發微信俾我——佢主動揾我，真係好少何。佢話可能未來兩年都會留喺廈門，因為領導揾佢傾過計，同佢講廈門分公司嘅發展前景會好啲。其實我想叫佢返嚟——唔係為自己，而係為佢阿媽。佢曾經話過自己同阿媽關係唔好，所以就算返廣州都唔會返屋企，我唔知佢哋之間發生過咩事，只係想勸佢唔好噉樣，子欲養而親不待，未有切身體會，唔會明白嗰種感受。真係好想叫佢返嚟，但係，我憑乜嘢？人哋留喺廈門會有更加好嘅前途。

唔寫囉，早啲瞓，希望今晚唔會再失眠。凡事都要有個適應嘅過程嘅，終有一日，我會好似當初對張敬軒粉轉路人噉樣放低安安。

PS：

有件事差啲漏咗講，今日梁智鋒去咗攞證喇！雖然我唔係好明：佢明明住芳村嘅，點解會去荔灣區民政局攞嘅呢？點都好啦，值得開心嘅——個個都留言話“恭喜”，但係我覺得：既然人哋結婚，係唔係應該要有雙喜先應景呢？所以我打咗“恭囍”。佢老婆好靚，我好羨慕，梁智鋒係個好男人嚟嘅，我相信佢哋會白頭到老嘅。

哦，仲有，頭先我阿媽話泉仔六月份又準備做老竇喇。我本嚟好驚訝咁快就生二胎，原來計落佢都結咗婚將近四年囉。時間過得真係快，只係我一直虛度咗。

同四年半之前嘅某個晚上一樣，今晚我喺華南影都睇完電影返嚟就一直用電腦重複聽一首歌，一首好冷門嘅歌，但係聽起身好有感覺。

我以為第73次已經係我相睇生涯嘅盡頭，估唔到原來伊個數字仲會遞增，唔知幾時先到極限。

12月11號，到今日為止，我同安安識咗啱啱三個月。亦都係今日，我同安安正式玩完喇，佢一直同我講對唔住，但係我無資格怪佢，某種程度上反而我覺得係我自私。佢同我講嘅嘢，我無打算有任何懷疑，佢係一個好不幸嘅女仔。

伊一切，我阿媽仲未知，我真係唔知應該點同佢講。

之前晚晚都會打電話俾安安、又或者發短信，但係今晚我無再揾佢，感覺真係有啲唔慣，唔知要揾啲咩嚟做先好噉。我諗，以後會慢慢適應啩？

PS：

今晚去睇咗《Hacksaw Ridge》，本來有諗過叫埋小慧同大肥種一起嘅，但係最後都係決定自己一個去。嗰兩個幾鐘，我一直喺電影院裡面流眼淚，唔知係為Doss當年嘅事蹟定係為自己今日嘅境況——真係虛偽，又無人睇到，流乜嘢鱷魚的眼淚？

仲有，同台灣翻譯嘅“鋼鐵英雄”或者大陸“血战钢锯领”嘅譯法相比，我更加中意香港簡簡單單譯成“鋼鋸嶺”伊個名，忠於現實、無任何修辭同粉飾。

開始寫伊篇日記嘅時候，時間已經過咗十二點。又係一年嘅光棍節，幾應景。

啱先同安安發短信嗰時無意中知道，佢13到16號會返嚟廣州。不過人哋另外有約會，無時間同我見面。

佢到底約咗邊個、要做啲乜嘢，我唔敢問。就算問，如果佢唔想俾我知嘅話，怕者都問唔出啲乜。

突然間好不是滋味，安安原本話出年三月就會申請調返廣州。到底應唔應該等佢半年，我真係越嚟越動搖。等佢半年無所謂，只係唔知出年三月份等到嘅係咩結果。

今晚“雙十一”，又係一年一度嘅全民狂歡網購。網易嘅首頁、電視廣告、公交站嘅廣告牌……甚至留几手嘅微信公眾號，到處都係京東“雙十一”嘅宣傳標語，感覺京東今年好似落重本、誓要同淘寶爭硬碰。

其實我本來無咩需要，不過好多時睇下睇下就想買。唔知點解，我好享受等快遞嘅心情，因為喺物流信息睇住份快遞離自己越嚟越近嗰種期待，可以稍微排解下內心嘅鬱悶，所以一唔開心就想買嘢，唔理係乜嘢，總係可以幫自己揾到買嘅理由。

落咗訂單等快遞，嗰種感覺唔知同俾咗禮金等婚期係唔係差唔多嘅呢？

伊兩日，龍姨俾咗安安阿媽個電話我阿媽，於是佢哋通咗一次電話，一傾就傾咗兩三個鐘。

知道咗安安屋企嘅一啲狀況：三姐弟、自幼父母離異、兩姊妹喺外面供緊屋——但係之前佢一直同我講租公司嘅宿舍嚟住。

同時我亦都透過佢阿媽知道咗安安對我嘅一啲睇法：個人幾好，但係懷疑我有語言障礙。

唉！溝通能力係硬傷。其實，我已經盡咗力㗎喇！

識咗將近一個月，今日第一次約安安出嚟見面——去工業大道嗰間海燕樓飲夜茶，306號檯。

之前想介紹小慧入嚟做，可惜啲領導話佢身高唔夠，無辦法啦。今晚安安話佢哋廠仲招人，小慧個專業都對口喎，寫埋篇日誌快啲問下小慧做唔做先。唉，而家想搵份啱心水嘅工真係好艱難。

上個月，我已經同坤萍講清楚喇，佢亦都無再晚晚發微信俾我。其實佢真係好好——好純品、好溫柔，係我中意嘅類型，只不過，我哋嘅年紀實在相差太大，佢應該搵一個年齡同自己相當嘅人，我伊啲老嘢唔應該糟蹋一個涉世未深、少不更事嘅妹妹仔。希望佢可以早日搵到一個真正屬於佢嘅人啦。

我真係唔想傷害佢。

第73次相睇，地點又係美華，二樓A01號檯，個女仔叫安安、86年，屋企住喺黃沙崗——從來未聽過有個噉嘅地方，條村應該好細。

今次係個女仔主動問我“防唔方便加個微信”，不過後嚟我阿媽話趁我去咗廁所嘅時候，佢話我唔講嘢、乜都係佢講，噉樣好無癮。

唉，佢公司派咗佢去廈門嗰間廠，每隔三個月先可以休一次探親假，最快要出年三月先可以調返廣州。我惗發展嘅機會都唔大。

大前日去咗醫院睇牙，個醫生話我有“智齒”、要掹、有話要補、又話根管治療，要分幾次做，而家惗返起真係骨都痺埋，後日又要去啦，真係唔知幾時先搞得掂。以後都要好好愛護牙齒。

今晚美華又有人擺酒，所以一如既往又去隔離嗰間鮮有魚川粵菜館。

真係巧合：上次嗰個女仔叫燕雲，同小雲同名；今次伊個叫翠紅，同紅姐同名。

唉，落夜班，狀態好差，龍姨仲叫一直我“同人講下嘢啦”，真係唔知俾咩反應，又唔好意思玩手機，唯有一味飲茶。

有一晚上夜班，周天杰當班、我上督導班、坤萍接緊五車道，張馥珣企廣場嘅時候行入嚟同我講：五車道那妮子在哭，問她啥都不說，你去看看吧。

我出去問佢咩事，佢話無事；問係唔係司機鬧佢，佢有話唔係；問佢係唔係唔舒服，佢又話無。於是我就頂佢一陣，叫佢去洗個面。佢返嚟依然係乜都唔肯講。

無幾耐張馥珣又行入嚟，啲表情好嬲又好笑：司機少給了她五毛錢，把她氣哭了！於是我又喺監控室搵咗五毫紙俾佢，安慰咗佢幾句。估唔到就係因為噉，佢居然中意咗我。

原本我都唔知，全部係秋紅話我知嘅，佢話坤萍經常喺佢同文麗面前話我“好帥”、話我點好點好，搞到秋紅同文麗笑咗佢好耐。秋紅仲話，以坤萍噉嘅性格，主動同人講自己中意咗一個人真係好難得，相撮合我哋。

其實坤萍都幾善良、幾文靜、幾可愛嘅，不過佢細我十一年，太懸殊喇。我話“我這種老東西不想禍害人家小姑娘”，秋紅仲想說服我：“你情我願的算什麼禍害？”唉，有啲嘢佢根本唔明，我好似坤萍咁大嗰時仲讀緊書，一個十幾歲嘅女仔完全唔懂事、識啲乜嘢？

跟住，坤萍主動加咗我微信，日日主動問我傾計：上班、落班、收咗幾多錢、返到宿舍、食飯、做運動、宵夜、瞓覺、每一日做過啲乜嘢都實時向我“匯報”，我覺得應該及早同佢講清楚，但係佢只係借秋紅把口向我透露、佢自己根本無同我表示乜嘢，而且我根本唔知點開口。唉！俾人飛、俾人拒絕得得多，點知輪到我自己嘅時候根本唔知應該點同人講清楚。不過，根據以往嘅經驗，交往耐咗、對我了解深咗，啲女仔對我就會變，希望坤萍都可以睇清楚我嘅為人、知道我根本唔適合佢啦。

今個暑假盧欣又去多咗次日本，仲幫我求咗道結緣符喎，佢仲話要隨身攜帶，唔知係唔係真係有效嘅呢？係就好囉，去到邊都帶住佢，希望可以早日遇到我嘅大和撫子。

今個月本來啲班排得幾有規律嘅，上起嚟都幾舒服下。但係自從有個女仔突然間申請休產假以嚟，啲班表就全部改曬，我大大話話已經有十幾日無休過息喇！唉，真係好攰。不過攰都無辦法啦，一樣要去相睇。

今晚相睇嘅地點依舊係美華，個女仔住喺江夏嗰邊嘅，好似叫“燕芸”——同小芸同名，不過唔知佢姓乜嘢呢。

唉！

伊兩日電視新聞、門戶網站講嘅全部都係王寶強同馬蓉，其實我唔知道演員鬧離婚其他人有乜嘢好湊熱鬧嘅，但係唔知點解連我自己都好關注伊件事。孰是孰非仲未蓋棺之論，但係——可能先入為主啦，我幾同情王寶強。舊年喺網上就有一種“中国男人已经配不上中国女人”嘅觀點。睇下街拍嘅相裡面嗰啲男人個個灰頭土面、爛身爛勢；但係啲女人就個個身光頸靚、化妝化到明艷動人。唉，有時唔係有錢就得嘅，“这是看脸的世界”，娶靚女未必就真係會幸福。而且，一個男人太老實怕者真係唔係好事。不過點都好啦，塞翁失馬焉知非福，希望寶寶可以重新振作，早日企返起身。

噚日，達少發咗一條朋友圈話：“相信一切都会好起来的。”相裡面嘅小麗面色好差。我無點在意，只係留咗句“加油”、習慣性點咗個讚，後嚟先知原來發生咗件噉嘅事。唉，有時真係覺得個天好殘忍，點解要噉樣對人哋呢？同埋我都係噚日先知，原來達少嘅身勢都幾可憐㗎，但係佢喺人哋面前一向都表現得好樂觀。希望佢哋真係無事啦，仲後生，實有機會嘅。

今晚美華又有人擺酒，費事等位等得太耐，於是又去美華隔離嗰間食。

個女仔姓陳、叫阿玲、聽講好似住喺鶴邊，都幾靚㗎，不過唔知人哋睇唔睇得上我啫。

唉，因為之前阿叔個女結咗婚但係我仲未有對象，噚日返鄉下摘龍眼，幾乎俾人集體批鬥。

如果可以嘅話，真係希望可以早日成家——唔係為我阿媽嘅唉聲嘆氣、唔係為姨媽嘅“唔好太揀擇”、亦都唔係為伯娘嗰句“想早啲飲到你杯茶”⋯⋯而係為我自己。

其實有時好迷惑：婚姻係一座圍城我信、喺外面嘅人固然想入去，乜喺裡面嘅人真係咁想出嚟咩？

關於錢老，有兩句話流傳得比較廣：

第一句毫無疑問：“婚姻是一座圍城”。

而第二句就係：“我見到她之前，從未想到要結婚；我娶了她幾十年，從未後悔娶她；也未想過要娶別的女人。”

我唔知第二句出處喺邊、係唔係真係錢老講嘅，我只係覺得，對於婚姻嘅描述，伊兩句話完全矛盾。

我無資格質疑錢老，只係惗唔明：點解人哋嘅婚姻係一座圍城，時刻想出嚟，而佢自己嘅婚姻就“從未後悔”“也未想過娶別的女人”呢？

其實，

唔知點解，今晚“美华”鬼咁多人，食餐飯居然要攞號等位，於是我哋去咗隔離嗰間“鲜有鱼川粤菜馆”。而家先省起，好似連個女仔叫咩名我都未知，淨係知道佢係嘉禾嗰邊嘅人、住喺羅崗、喺地鐵站啲報刊亭做銷售。

唉！唔理囉，如果急有用嘅話怕者我早就結咗婚。或者正如啲人安慰我嗰時使用嘅統一標準用語噉啦：“緣分未到啫，緣分伊啲嘢好難講嘅。”

PS.
聽講前幾日妗婆入咗院、要做手術，唔知佢而家點呢？好耐無見過妗婆囉，上一次見面已經係舊年過年嗰時嘅事，希望佢可以快啲好返啦。