記得兩年前嘅今日，我同一個女仔去花城匯嗰間UA睇咗場電影、喺體育東嗰間萬歲食咗餐飯。跟著就無咗下文。佢叫張蕾，係我第17個相睇對象。

唉，噉就兩年啦，唔知佢而家點呢？

我仲記得兩年前佢同我講過，佢想同佢老竇去日本旅遊。今年，我已經去完日本返嚟啦，唔知佢去咗未呢？

今年，我仍然喺相睇嘅路上尋尋覓覓、跌跌撞撞，唔知佢搵到自己嘅Mr Right未呢？

老實講，我真係唔知自己哩兩年係點過嘅。兩年后嘅今日，我迎嚟自己啲45次相睇。

喺祥景花園附近嗰間周記黃石店嘅4號檯，個女仔叫阿霞、住喺棠溪、喺屋企四姊妹裡面排行第三。

又係一次無結果嘅相睇。

上個月28號嗰晚我喺新城上夜班，見到斌少車住條女喺車道經過，唔驚唔覺佢辭咗職都有幾個月囉，無見一排嗰條死仔變到滿面春風，同我打招呼嗰時仲鬼咁風騷。望住佢部車越開越遠，唔知點解，我覺得有啲失落，但係又忍唔住會心一笑。雖然佢唔願意俾我見到條女係咩樣，但係條女身材幾好㗎。唉，我無啫，見到人哋有都覺得開心嘅。

失魂魚準備升督導啦，聽講佢仲準備年底結婚添；良哥仔好似又係年底結婚；周相公已經休完婚假返嚟；連斌少有女朋友囉……

今年食啲同事派嘅花生同喜糖都食到牙痛。其實我都想派喜糖俾啲同事食㗎！到咗哩個年紀，過年已經唔稀罕同事啲利是，咁大個人，佢哋派利是俾我我仲覺得唔好意思添。唉，過年過節，我都好想派利是俾人啊！唔知派利是嘅感覺係點嘅呢？真係好想試下。

如果我都可以快啲搵到對象就好囉！

自從上次之後，好耐都無再相睇過啦。一嚟年紀越嚟越大、合適嘅相睇對象就越嚟越難搵，二嚟係因為前嗰排公司好多嘢要做，又換系統又更新設備準備七月份全省聯網，而且今年以嚟走咗好多人，公司招人嘅速度遠遠唔及啲舊同事辭職咁快，招嚟招去始終都仲係唔夠人手，加班加到我怕啊，班表改完又改，相睇嘅事就唯有一推再推。

好奇怪，啲媒人搵唔到合適嘅相睇對象嗰陣我好想佢哋快啲幫我搵到，但係當佢哋約我去相睇嘅時候我其實又唔係幾想去。

就好似今日，我連續上咗咁多日班，真係好攰，但係收工之後我仲係要跟住阿媽準時赴約，進行我人生第44次相睇。

今晚相睇嘅地點係三元里嗰間美華，1樓175號檯，個女仔叫潔兒，住係夏茅。

又係一次未開始就估到結果嘅相睇、又係一次無結果嘅相睇。其實我真係好懷疑：我一次又一次噉跟阿媽去相睇，相睇哩段漫長嘅經歷會唔會為我結出一個哪怕唔係太大、唔係太甜嘅果實？我又要用侷促嘅冷汗同辛酸嘅淚水喺哩條路上灌溉幾多個春秋先至可是收穫哩個果實呢？下晝收工之前，就連何生都話我噉樣去相睇法係唔會追到女嘅。但係除咗噉樣我又可以點呢？

喺母親節嗰日，聽到我阿媽打電話周圍求人哋介紹對象俾我識，我真係覺得好心噏。唔知點解，嗰晚我瞓喺床上面一直喺度流眼淚，其實我真係好驚，但係到底驚啲乜嘢，連我自己都講唔清楚。

第44次相睇已經過咗啦，我知道第45次好快就會嚟到。但係唔知屬於我自己嘅嗰段緣分幾時先到呢、我到底可唔可以喺自己嘅有生之年等到嗰個人出現？

相睇得多，唔知係越哩越有經驗定係越嚟越麻木呢？

記得第一次去相睇之前，我阿媽專登帶我去飛咗個髮、我老竇忍痛攞出佢香港嗰個表姐送嘅西鐵城俾我帶——嗰隻手錶連佢自己都唔捨得用，一直收埋喺柜桶裡面，保存的好好嘅。印象中我老母仲封咗兩封利是俾我，祝我順順利利。總之，第一次相睇真係搞到好隆重。

但係，今晚我嘅第43次相睇，我已經完全無曬當初嗰種忐忑、拘束同謹慎，甚至已經無曬相睇嘅感覺。反正就係去見個面、食餐飯，就咁簡單。

今次個女仔姓劉、叫阿苗、86年、住係彭邊、喺體育西做嘢，而我同佢嘅晚餐就選擇咗喺正佳三樓嗰間必勝客嘅12號檯。

唉！食嘢之餘，傾幾句噉囉，反正唔抱乜嘢希望。

今晚同阿苗一共食咗171蚊，返到屋企我阿媽係都要俾返錢我。同其他父母唔同，我老母從來都無對我提出過按月交家用之類嘅要求，好多時反而仲會俾啲錢我添。

唔知點解。睇住我阿媽放喺書檯嗰300蚊，我真係講唔出咁心酸。

曾經，我一度埋怨父母。以前我同女同學通個電話佢哋都審犯咁審，而家就怪我唔點樣識同女仔溝通；以前一味千叮萬囑“唔好拍拖”、“唔好早戀”，而家就催喉催命……點解唔可以由得我順其自然？

唉，年紀大咗就唔會再有怨天尤人嘅餘地。

阿媽俾嗰300蚊，我會好好地收埋佢。以後，如果有機會嘅話，我會同某個人講返哩300蚊背後嘅嗰個故事。

當我喺E03嗰裝緊卡嘅時候，有個女仔行過嚟問我借手機，講完仲專登遞佢部iPhone過嚟畀我睇，個屏已經完全裂曬。個女仔好靚、身材好高挑、好有氣質，但係我見到佢面上仲掛住淚痕。半夜三更突然間有個人喺部發卡機後面轉出嚟，當時真係嚇咗我一跳。我同佢講，我哋上班係唔可以帶手機嘅，佢又“對不起”又“謝謝”講咗一大輪先至抽泣住轉身離開。
佢一直行到隔離嗰間新邦物流嘅門口我先見到仲有個男人坐喺門口嘅樓梯度。佢喺嗰個男人身邊坐低之後就開始同佢嘈，唔知因咩事個男人仲開始打佢添。可能部iPhone就係喺佢哋拉拉扯扯嘅時候整爛㗎啦。
好耐之前聽波波講過佢喺接入口嗰時嘅一段見聞：有個男人要趕住去機場搭飛機，佢女朋友死都要攔住部的士，流住眼淚當眾跪喺佢面前求佢唔好走。講到最後，波波顯得好感慨：“個女仔生得幾靚㗎，身材仲好好添。唉，嗰個男人都唔識珍惜嘅！”聽完之後我半信半疑，淨係喺度笑。估唔到今晚同樣都係喺入口就畀我見到哩一幕。我真係好難相信、好難想像有人會噉樣對自己女朋友。雖然已經兩點幾，路上無乜人，但係當街當巷都可以對女朋友咁粗暴，你話喺私底下會點呢？
檢查好曬啲設備之後，我一直望住佢哋喺對面拉拉扯扯，心情真係矛盾到極點。我好想過去勸阻，但係唔知點解一直都無勇氣。
好奇怪，雖然畀男朋友又打又鬧，但喺個女仔似乎點都離唔開佢，嘈下嘈下又攬埋一齊，甚至瘋狂激吻。真係令人費解。睇住佢哋最後上咗部的士走咗，我仍然覺得好難受。
喺哩三年半嘅時間裡面，我一直幻想有朝一日可以通過相睇嚟覓得真愛，但係原來我根本唔知乜嘢係“愛”。
“問世間情為何物”，情情愛愛哩啲嘢真係好難理解。
就算遇到阿Sam咁成熟穩重嘅好男人，余春嬌一樣放唔低張志明；無論尚優優幾咁溫柔體貼善解人意，張志明最後都係選擇返餘春嬌。
點解？恐怕連余春嬌同張志明自己都唔知。
就好似點解嗰個女仔寧願忍受男朋友嘅拳打腳踢都無勇氣離開，怕者連佢自己都唔知一樣。
一年幾之前，我以為只要自己一心一意噉樣為感情付出，阿婷就會永遠留喺我身邊。但係事實上哩啲嘢係無得勉強嘅，愛情唔係科學，唔可以用力嘅原理嚟詮釋。當我對一個物體施加50N嘅壓力，佢同時都會對我施加50N嘅反作用力。但係，我好中意一個女仔，佢唔一定都會咁中意我；我對一個女仔好好，佢亦都唔係事必要領情。
愛情唔係科學，無道理可講、無規律可循，甚至無人可以講得清佢到底係乜嘢。但係，好多人都受盡佢嘅折磨，終其一生都得唔到解脫。
唉！問世間，情為何物？

可能係心理作用啦，一直都覺得萬達嘅風水唔係幾好。因為唔知點解，先後有幾個女仔，原本同佢發展得好地地嘅，但係一去完萬達之後，無過幾日就即時玩完。所以我得閒就算真係唔知有乜嘢地方好去都唔會去萬達嘅。

但係阿珊偏偏就揀咗萬達作為我哋第一次見面嘅地方。

2014年4月4號，我人生第42次相睇，個女仔姓黎、叫阿珊、86年、望崗人。

我哋喺萬達三樓嗰間綠茵閣食咗餐飯，今次坐嘅係205號檯。食完飯之後喺沃爾瑪行咗一圈就走啦，佢話聽日要去拜山、想早啲瞓。

我哋一齊去搭地鐵，但係佢係返嘉禾嗰個方向、我係去三元里嗰個方向，所以我等佢入咗地鐵先走。

雖然我都唔係幾啱心水，但係睇住佢搭上嘅嗰部地鐵開入黑暗嘅隧道，我竟然有啲傷感。

唉！我知道，我同佢唔會再有第二次見面。

我哋，只係彼此嘅人生中一個匆匆嘅過客。

2014.03.25

同阿玉相睇完之後，今日已經係第三日啦。

但係我無打過電話俾佢，因為我根本無勇氣投入感情。

當時佢俾我嘅第一印象就係嗰種好斯文、好溫柔、好順得人意嘅女仔，完全無之前睇過嘅某啲女仔嗰種不可一世嘅感覺。而且生得白白淨淨、面尖尖噉，望落都幾靚女。

個媒人問覺得佢點嘅時候，我阿媽話無所謂、只要我鐘意就得，講到好似好民主噉，但係原來佢一開始就嫌棄人哋。

其實一直以嚟我都好好奇，廣州人哩種莫名其妙嘅優越感係從何而嚟、廣州人憑乜嘢睇唔起外地人、憑乜嘢覺得外地人嚟到廣州就係想攞著數呢？

唔知點解、亦都唔知由幾時開始，曾經性格非常之反叛嘅我喺父母面前變得好軟弱，當年不知天高地厚、同父母頂撞嗰種鋒芒完全無曬。喺佢哋軟硬兼施噉同我講明“利害關係”之後，我只係覺得，既然父母唔鐘意嗰個女仔，就算我真係可以娶佢過門、對佢幾好佢都唔會幸福，因為哩啲嘢根本就唔凈止係兩個人嘅事。

唉！既然註定係無結果嘅話，不如就唔好開始啦，無謂受哩段“曾經擁有”嘅折磨。我哋都已經唔細㗎啦，所剩無幾嘅青春已經經唔起歲月喺盲目追求“曾經擁有”裡面嘅蹉跎。

阿玉，對唔住啊！

祝你早日搵到你嘅真命天子、搵到一個可以真正俾到你幸福同溫暖嘅家。

真係好對唔住！

第40次相睇，喺新市墟百信廣場3樓嗰間金飯碗嘅C05號檯。

個女仔姓劉、叫阿玉，陽江人，好似喺銀行做保險。

蝶舞鶯飛又一年　花開花落沒淒然
此情早付東流水　卻趁春潮到眼前

梁羽生啲小說睇得唔多，而且好多情節都已經唔記得曬。唯獨卓一航寫俾練霓裳嘅哩首詩令我過目不忘。

2046年、地球上は无限に伸びている鉄道网に覆われている。一両の2046行きの特别列车が动いている。2046へ行く乗客たちの目的はただ一つ、失われた记忆を取り戻すためだ。それは2046では全ての物事が永远に変わらないからである。これは真実かどうかは谁も知らない、今までそこから戻ってきた人は一人もいないからだ、私を除いては。

2046を离れるためには长い时间がかかる。简単に离れる人もいれば、长い时间をかける人もいる。自分がどれくらい长くこの列车にいたかはもう思い出せない。寂しさを感じ始めた。

なぜ2046を离れたかを闻かれる旅に、私は言叶を浊してごまかす。昔、心に人に告げられないを抱えているとき、彼は山の深くに行って、ある木に穴を开けて、それに向かって秘密を言った后土で穴を埋めれば、この秘密はもう他人に漏らされることはない。私はかつて一人の女を爱した。しかし彼女は行った。私が2046に行く理由は彼女がそこのどこかにいると思うからで、しかし彼女を见つけることはできない。彼女が私のことが好きかどうかを知りたいが、ずっと答えを得られないでいる。その答えは秘密のように、永远に谁にも知られない。

全ての记忆は濡れている。

——《2046》

玩咗八日，今日真係要走啦。

日本，さよなら！