寫伊篇日誌嘅時間係7月9號凌晨、星期二，但係因為隻手錶嘅日曆唔係瞬跳，所以顯示重係星期一。

今個月阿英入職滿一年，申請到三日年假，連埋週末一共可以休到五日，於是我都申請七月底休年假，惗住同佢一齊去旅遊。

其實行程喺年頭就開始計劃：一開始阿英話想去法國，但係當時法國有暴亂；後嚟我喺微信群睇到一篇關於郵輪嘅軟文，覺得幾唔錯，提議搭郵輪落南洋，但係阿英上網搜咗下話價錢都幾貴；跟住佢話想同我去多次泰國（佢之前已經去過兩次），但係醫生唔建議佢搭飛機；噉我問佢去蘇杭好唔好，佢話已經去過杭州西湖，費事去多次；跟住佢又想去重慶，但係無幾耐之前四川又有地震，我擔心重慶會受到波及；我又話不如去北京啦，佢又嫌就算搭高鐵一來一回都已經無咗兩日，而且佢之前都已經去過北京；討論來討論去，本來最終係決定去上海嘅，但係佢聽到個閨蜜話千島湖好靚，又改變咗主意——之前又係佢自己話已經去過杭州嘅，閨蜜嘅威力真係巨大。不過我又無乜所謂，反正都係休年假出去玩啫，杭州咪杭州囉。

可惜，始終都係去唔成。阿英一開始就覺得我阿媽唔會畀佢去，因為佢而家大住個肚，我重以為佢太多心添。佢一直催我問下我老母先，點知真係畀佢估啱咗。唉！無辦法啦，行程唯有取消。

其實，已經係噚日（7月8號）中午嘅事。

一如既往，我阿媽講下講下就扯咗去第度借題發揮、重越講越激動，面對住我阿媽伊種血統純正嘅“好好说话会死星人”，我全程一聲都唔敢出，由得佢講、由得佢鬧。唉，出面嗰啲八婆一撞到就不懷好意噉截佢問幾時抱孫，我都知係好煩嘅，我喺站裡面咪一樣係噉？唔啱聽嗰句當聽唔到咪算囉，真係唔明佢點解咁嬲。嗰啲“看熱鬧不嫌事大”嘅八婆咪就係想激嬲你等佢哋有嘢睇啫嘛，點解要中佢哋下懷？

唉，算啦。阿英話休年假嗰幾日佢返嘉禾喎，叫我自己搵節目。失望肯定失望啦，就係唔知佢有無嬲。

PS：

美度新出嗰隻指揮官真係好靚，灰盤橙針——唔知點解，我好中意噉樣嘅配色。

哦，重有，今日見到好多無車牌嘅白色“广汽传祺”經過，全部喺機場過嚟嘅，司機清一色係警察，小胖重話見到好多部車裡面都有一個制服警花陪住個領導，應該幾大粒下。開班前會嗰時先知原來今日公安部有好多人落咗嚟開會討論應對突發事件，唔知係唔係我多心呢？估計香港嗰邊嘅事態會進一步升級。

當年，我阿公身體唔好，成日要住院。為咗幫輕下屋企嘅負擔，我阿媽14歲就輟學去工廠做嘢——最記得佢講過：早上重返緊學，中午返到屋企阿公阿婆話而家未夠年齡都收喎，“哦！”就噉樣，佢下晝即刻放低個書包就去返工。

唔知係出於傳統嘅習慣定係當時嘅潮流，佢開始上班無幾耐阿公同阿婆就送咗隻手錶畀佢——一隻手動上鏈嘅機械錶，舊年佢畀咗我。

到而家我都唔知到底係乜嘢牌子，淨係依稀睇到“上海钟表拉丝”嘅字樣（好似係），應該係國錶。

雖然係國產嘢，但係質量非常之好，喺嗰個物質極度匱乏嘅年代，好多嘢就算有錢都未必買到——乜都要票，甚至要託人搭關係，但係嗰時啲嘢嘅用料、做工真係比而家良心好多。

對於手錶，可能我哋而家講究得更多嘅係瑞錶嘅血統、德錶嘅韻味、或者日錶嘅性價比……但係似乎都唔及老一輩心目中對國錶嘅嗰份情懷。

我阿媽隻錶從來無攞去做過保養，但係幾十年嚟都無乜事，唯一嘅問題就係每逢落雨錶盤裡面都會有一層水霧。阿英嗰隻鐘錶王國嘅來路嘢就差得遠囉，買咗先半年左右——嘖嘖，這個粗手粗腳的敗家娘們！（畀佢知道我喺背後噉樣講佢肯定又嬲）

今日我阿媽話佢自己一個去睇住團長就得，唔駛我去，於是我就攞阿英隻手錶去睇下到底咩事。

接待我嗰位小姐得出嘅結論係：“無乜嘢大問題。”但係……睇到個報價都唔知整唔整好。

想當初，喺澳門打完折再折返人民幣先四千幾。唉！無辦法啦，唔通唔整咩？

跟住去幫阿英買個藍牙鼠標，本來佢已經喺淘宝落咗單，後嚟嫌人發貨慢又退咗貨，叫我幫佢去實體店買。電腦用品專賣店伊家嘢，通常唔需要嘅時候就感覺周圍都係，一旦需要買嘢奉旨搵唔到。去北京路嗰間“新联 ”問過，淨係得蘋果原裝嘅鼠標，但係之前阿英嫌原裝嘅太貴，所以我就去廣百嘅微軟專櫃買——雖然無蘋果原裝嘅咁貴，但係都要￥278。

買完去食嘢嘅時候發現一樓嗰間勞力士專賣店關咗門，唔知係裝修定執咗。其實，就算執咗笠，某種程度上我覺得都係必然嘅事——租咁大個店面，裡面十個八個櫃全部空寥寥，喺北京路伊啲寸土尺金嘅地方都唔知佢點樣賺錢嚟維返條數，而且啲店員又老閪，一個個唔瞅唔睬當你無到，同對面嗰間Omega真係無得比。

重有，前嗰排表哥去俄羅斯旅遊，帶咗塊朱古力返嚟畀我。從來無食過俄羅斯嘅朱古力，唔知味道點呢？睇起身好似幾唔錯。

我阿媽28號開始去療養，屋企淨得我同阿英兩個人。

難得咁啱我可以連休三日，28號瞓到自然醒，起身拆咗空調兩塊濾網出嚟洗，跟住就搭地鐵去天河睇錶，聽講指揮官出咗第三代，但係天河城百貨同中怡廣百嘅專櫃都見唔到有，反而BELLUNA時分偏芯嗰隻M024.444.16.031.00喺天河城有貨——買唔起LANGE 1、雅克德羅大秒針同格拉蘇蒂原創嘅偏心系列，美度同雷達嘅時分偏芯錶款其實都係幾唔錯嘅替代品。

跟住去點都德食啲嘢（一籠“瑤柱珍珠糯米雞”）、摣住本Kindle坐咗成個下晝。

喺點都德坐到差唔多就搭地鐵去接阿英收工，返嚟西村嗰間大家樂食飯。

噚日係星期六，阿英都休息，我瞓醒嗰陣阿英已經拖完地囉，中午佢負責煲飯，我就出去市場買啲餸返嚟食。第一次覺得唔多夠，再出去買啲添又好似多得滯。

下晝就陪阿英去省婦幼複診，期間有一段小插曲：喺預約彩超嘅時候可能發生咗火警，跟住連消防車都嚟埋。我驚到時著火、又驚啲煙會對阿英有影響，所以一搞掂就拉住佢走出去，但係佢就一味顧住睇熱鬧，真係無曬佢辦法，唯有帶佢去華南影都嗰間麥當勞點啲嘢坐下。

嗰時我先發現，阿英隻貝倫賽麗居然停咗、點樣上鏈都唔行。唉！今年1月28號先買嘅，半年都唔夠，噉就壞咗。

阿英可能驚我嬲，唔止一次話佢無整爛、只係試過幾次放喺個袋裡面擺入安檢機。我話無所謂，保修期未過，唯有攞去睇下咩事啦，買嗰時聽裕興隆個店員講，好似體育東路財富大廈有個點，得閑去睇下。

跟住就去百信嗰間綠茵閣食飯。

食完飯，去hotwind攞埋阿英對鞋，嗰對鞋喺淘宝賣￥99包郵，但係實體店先賣￥79，所以佢執意要買。

返到屋企都好夜囉，沖涼、洗衫、瞓覺——總嘅嚟講，伊幾日假期過得好充實。

PS：

原本應承過阿英，買完隻撈就“消停”，但係又情不自禁噉中毒喇！

唔得，一定要忍住！

日日係噉開工，感覺已經好耐無休過息，從今日開始終於可以連休三日，中午同我老母一齊去市一探團長。

團長嘅意識已經清醒咗好多、可以開口講到啲嘢，不過重係唔成句，兩隻手重唔係好靈活，不過賊船話佢今日畀人扶住已經可以行到路。照噉睇應該會慢慢好喇。幾日之前佢重喺ICU嗰陣聽我老母講，醫生話醒唔醒得返都要睇佢嘅意志，嗰時真係……雖然我喺微信同表姐講“無事嘅”、叫佢唔好太擔心，但係其實我都無底。

唉！唔經唔覺，團長同我阿媽嗰代人都已經唔再後生喇。本來生老病死都係自然規律，點解就硬係要賦予世人咁多嘅喜樂哀愁呢？

希望團長真係好快可以出院啦。

ＰＳ：

噚日中午因為去攞准生證嘅事同阿英喺微信拗咗幾句，而家重冷戰緊，頭先佢喺個群話今晚加班，叫我哋食飯先，留飯畀佢，我覺得其實佢係唔想咁早返嚟。

聽日我老母就去療養喇，過幾日先返，希望伊段時間同阿英嘅關係可以有所緩和。

今日賢叔又嫁女，我老母同我重有阿英一齊返鄉下飲。本來同阿英講過：只要同佢一齊出街，我就戴我隻指揮官二代，同佢隻貝倫賽麗配成情侶錶——內涵我無講：同佢度過嘅都係美好嘅時光。但係今日我無——每逢返去參加伊啲場合，我都會戴老竇畀嘅西鐵城。唉，就當係老竇睇住佢哋一個個成家立室啦。

之前聽何生講過，佢哋龍歸嗰邊啲人接新娘係帶埋螺絲批、spanner同錘去嘅，唔肯開就拆門。今日先見識到啲人玩得幾咁癲，聽講連不鏽鋼門都踢爛埋，但係我好奇上去睇過又好似無乜事。我最記得賢叔喺度搖頭苦笑話“嫁一個女整一次門”——雖然好無奈，但係佢都幾開心下。

淨係喺祠堂擺，但係都幾好餸，啲出品一啲都唔差過大酒樓。

不過，其實今日心情並唔係幾好。因為要上夜班，今朝八點收工先可以搭車去地鐵站同佢哋集合，所以我叫阿英幫我去麥當勞買個“烟肉蛋麦满分”，本來噚晚我老母都無講乜嘢嘅，但係唔知點解今朝就一直唔停口噉鬧，話我唔懂事、喺出面亂咁食嘢……重話我結婚之前好老實嘅，娶咗阿英之後就成日講大話。本來，啲唔啱聽嘅嘢我可以當聽唔到，但係阿英就忍唔住、好嬲好嬲——噉樣一嚟就搞到我都好煩。

好在，都有啲好嘢排解下鬱悶嘅心情。今朝10:16收到微信，10號嗰日落訂嗰隻撈終於到貨喇！枝哥開車送我同阿英仲有佢大嫂同侄仔去機場搭地鐵，我連覺都唔瞓，返到屋企放低啲嘢即刻又出去，攞埋張單去天河城嗰間專賣店找埋啲尾數。不過可惜，淨係得隻錶，保修卡同個盒都未到，要下次再去攞過。

10號嗰日我問過店員（今日先知佢叫“罗小姐”），綠水鬼同Daytona排隊要排幾耐。佢話而家綠水鬼唔接受預訂，Daytona只有鋼迪嗰款可以，不過排隊要排十年，等都無意義。今日我又問另一個店員，如果想買要加幾錢，佢重話唔接受加價、搭售同預訂添，睇嚟想買熱門款真係唯有隨緣。

其實，佛係一啲都未嘗唔好啊。連126334都無貨，伊隻就幾唔錯。

不過，買完伊隻真係要停下喇，一勞永逸啊嘛！無本事搵錢唔好學人玩錶，睇下就好喇。

PS:

省婦幼嘅婦產科真係好鬼難掛，一個星期之內嘅號已經全部無曬，我老母又唔同意阿英話去區婦幼，都唔知點算。另外又要返公司辦伊樣搞嗰樣，唉！都唔明點解要搞到咁複雜。

好耐無更新過blog囉，自從前年四月份突然間登錄唔到、連WordPress個app都顯示亂碼，一直到舊年好似年中先用50蚊叫到七天美橙個哥哥仔幫手搞返好。其實伊兩年發生咗好多事，但係都唔知係阿英搬咗入嚟唔方便定係自己懶，所以一直都無將伊一切寫低。

不過，今日都係寫啲嘢啦。噚日（6月13號）陪阿英去複診，終於陀穩咗喇，佢照完彩超出嚟話我知醫生話“挺好”嗰陣，我真係幾乎眼淚都流埋出嚟。點都好啦，希望跟住落嚟都順順利利。

兩年無寫blog，感覺好多嘢都唔同咗，尤其是WordPress嘅後台界面我好唔習慣，以後慢慢適應啦。

重有，今日登錄Flickr先知，原來免費午餐已經無咗喇，睇嚟以後唔可以再貼咁多相上嚟囉——如果搵唔到免費圖床嘅話。

阿英今晚要加班，差唔多返到嚟喇，唔寫住先，以後有機會嘅話，再慢慢補充返伊兩年嘅嘢。

PS:

自從TVB開始走向沒落以嚟，我已經好耐無睇過港劇，前嗰排《鐵探》大熱，啲觀眾評價好高，於是我都去湊下熱鬧。套劇本身的確唔錯，好睇過《潛行狙擊》同《使徒行者》，甚至連《法證先鋒4》都無得同佢比。點知追到第20集突然間要VIP先可以睇，局住充咗一個月會員，廿雞啊，唉！

今晚同阿英傾微信，佢突然間話覺得我把聲好好聽。我同佢講，我以前係節目主持人，佢居然信到十足十。
印像中好似從來未試過有一個女仔咁容易相信我，真係有啲咁動。

PS:

噚日站組織去崗貝嗰間魚米軒，聽講戰況非常慘烈：李站第一個醉、後嚟小強又醉咗、陳劍鋒賢弟係例牌醉嘅、仲有大熊、許雯靜……就連成日笑人酒量差嘅超哥都冧低埋，搞到幾乎無人可以返嚟上中班，唯有等早班嘅恩哥同全哥踩埋佢。聽日輪到第二批去喇，紅姐話唔好再帶咁多酒去。唉！聽日我食完嗰餐飯之後應該仲可以返去開工啩？

無幾耐之前喺Google Drive揾到一張表格，我都已經唔記得咗有張噉嘅嘢囉，估唔到仲搵得返。其實張表仲未完，只係當時Google突然間俾GFW封鎖咗，我又未識翻牆，所以無再記落去。而家，我已經又喺另一段征程上跋涉，唔知幾時先到盡頭。

今晚“美华”門口棟住塊“严府宴客”嘅牌，我以為又要去隔離食飯，但係原來仲有位。今次坐嘅係二樓嘅262號台，個女仔姓鐘、叫阿英、住喺嘉禾、喺客村嗰邊做嘢，個妝化得濃咗啲、眼眉應該有紋過、右手手臂內側有紋身，算幾靚（睇起身有啲似依依）。不過，我無抱咩希望，面試過咁多次，有無機我一睇就知。所以，咪當食餐飯就算囉。

喺相睇期間，龍姨同我講得最多嘅一句話就係：“同人講下嘢啦！”我阿媽都成日話我食飯嗰時唔出聲。其實我問過好多人：喺相睇嘅時候應該同對方講啲乜嘢？點知個個都話，第一次見面有咩講？大家都俾阿媽望住曬，講乜都唔自然啦，所以都係媒人同雙方家長講嘢，至於相睇嘅當事人，男女都唔會點出聲，都係之後約出嚟再慢慢溝通嘅。

但係，點解我就好似特別唔同嘅呢？

如無意外嘅話，下一個相睇嘅對象應該係一個住喺芳村嘅女仔，齊姨介紹嘅。結果係點，拭目而待。

“年晚煎堆——人有自己有就算。”我阿媽今晚講咗不下三四次。

今次個女仔姓黎、叫阿華、喺火車站嗰邊嘅鞋城做會計、好似係望崗人——龍姨話佢哋係同一個地鐵站落嘅。

地點又係美華二樓、230號檯，過程無咩特別，只係喺上菜嘅時候特然間覺得，次次相睇都係出嚟食飯，次次出嚟食飯都係為咗相睇，自己嘅經歷都可以翻拍一部《飲食男女》同《相睇一刻》嘅屌絲版——當時我忍唔住想笑。

唉，其實我真係好攰。

PS:

前日安安喺微信同我講，佢升咗做生產部嘅中層，調返廣州嘅機會越嚟越渺茫，27號到29好去重慶開會，今朝睇到佢發朋友圈，佢哋重慶分公司正式揭牌，間廠都幾新淨幾骨子喎。

前日開始又降溫，唔知點解我覺得條腰骨梗曬、好痛，同小慧去跑步都無乜點跑，唔知係唔係開始有啲風濕呢？唉，年紀大咗真係唔到你唔認老。

有時真係覺得啲人好奇怪，明明已經過咗去，點解仲要咬實唔放一直係噉問？

唉，今晚係第73次相睇，地點係美華二樓230號台，個女仔好似叫阿珍。唔知係唔係已經麻木——定抑或無準備好，我對今次嘅對象似乎無咩睇法。

到底試唔試下同佢交往？我真係唔知啊。

PS：

娟姐喺Q群話佢今朝生咗個女。佢一般喺新城、我喺新市，雖然好少見面、亦都唔係好熟，但係我都好為佢開心——一仔一女，湊成一個“好”字，完滿囉！