7月27到31號休年假，八月頭大部分休息時間同阿英重合，唔方便寫嘢，跟住有幾日又病到五顏六色、發燒發到成39°C（準確嚟講係38.9°C），伊兩日先好少少，所以篇日誌就拖到而家先寫。
本來26號我上夜班，但係嗰晚歡歡幫小胖還班畀我，所以其實我嘅年假喺26號就正式開始。
不過就算畀我休多一日都無用啦，千島湖係無得去喇，第一日除咗去友誼睇錶同去宜安廣場嗰間瑞幸買杯Cappuccino嚟飲，基本上白費咗。
第二日，陪阿英去複診，連我都要抽血。後嚟查到佢有蠶豆病，佢阿媽同佢細佬都有，好可能會遺傳。唉，我有啲擔心。
第三日，陪阿英去海鷗島玩。成十點先出門口，出地鐵食個味千拉麵，咪咪磨磨，轉車去到都點幾鐘囉。
可惜天氣唔係咁好，不時有啲雨絲，不過都幾舒服。
本來係我開車嘅，但係因為阿英計劃生完就去考車牌，所以我畀佢預先熟悉下、練習下。
喺開車環島嘅時候，阿英因為顧住周圍望，差啲撞埋人哋部車度（好似係豐田），佢雖然扭軚避開咗，但係都係撞跌咗一部停喺路邊嘅綿羊仔，好在人哋部車都係租嘅，無咩事就唔追究。
環島遊到夠就退車，去太古倉。
好多文藝青年嚟影相
天色越嚟越夜，貨比三家，最後都係決定嚟返伊間MR.ROCKY。
坐到差唔多就埋單走人。
之前阿英問過我，年假嗰幾日有乜嘢打算？我話，如果你決定咗返嘉禾，我就落香港玩幾日。佢話佢又去，但係而家香港垃垃亂，我唔放心畀佢跟埋落去，所以唯有打消伊個念頭。佢知道我立心寧願自己唔去都唔肯帶佢落去之後就話放過我，畀我自己落香港、佢返嘉禾。
於是，7月29號我就落香港。
不過其實都唔係咁順利，因為我阿媽唔係好想畀我落去。前一晚我話準備落香港行下，佢扮到好不經意噉問：“而家重落去啊？聽講香港好亂喎。”
我話：“係咩？”
佢話：“唔係咩？”
我又扮到毫不上心噉答佢：“一啲啲地方啦。”
佢就即刻趁勢話：“係啊！軍長話佢喺香港啲親戚都叫佢唔好落去啊，佢哋都話而家香港好亂，都係唔好去囉！”
“人哋亂關我咩事？我又唔參與嗰啲嘢。”
我老母噉先無再出聲。
其實，我早就訂好咗酒店、買埋境外流量添囉——喺支付宝買嘅联通境外流量，￥26一日，係“飞猪”嘅“游惠宝境外通讯旗舰店”提供嘅流量包，點知落到香港先發現原來係有墻嘅，Facebook、Twitter、Google、Wikipedia……全部上唔到，垃圾！不過姑且將就住用嚟緩解下燃眉之急啦，好過完全上唔到網連用“高德地图”嚟導航唔得。今次住嘅係油麻地一間叫做“Casa Hotel”嘅酒店，￥498.45兩晚，記得舊年同阿英落香港，重慶大廈都要三百幾一晚，之前住過兩次嘅聖地亞哥更加要四百幾蚊，所以今次感覺上比較超值。
喺附近一間大家樂食完飯，因為要兩點先夠鐘攞房，所以就搭地鐵去尖沙咀海港城嗰間太子珠寶睇（mǎi）錶。個店員同我講，嗰兩日中環、金鐘同元朗嘅衝突比較激烈，叫我唔好去，其它旅遊地方都係安全嘅。其實，之前喺微信群經常睇到有人轉發一啲侮辱香港民主人士嘅五毛帖、亦都喺Facebook睇到好多謾罵特區政府同香港警察嘅言論，感覺上雙方都稍嫌片面同偏激、都有失偏頗，所以嗰幾日我一直心思思想去親身感受下、親眼睇一睇事實嘅真相，唔好畀人喺思想上牽著鼻子走。但係我應承過我阿媽唔搞事，去到嗰啲好似打仗噉嘅地方有時真係身不由己，唔係話你唔搞事就可以無事嘅，所以我一直無付諸行動，只係喺油麻地、旺角同尖沙咀（唔知香港人講嘅“油尖旺”係唔係就係伊三笪地方嘅合稱呢）一帶行下。
不過講開又講啦：放眼世界，中國人可以算係口頭上最擁黨、最愛國嘅群體，但係縱觀歷史，中國同時亦都係戰時出最多叛徒嘅國家，真係令人百思不得其解。
唔知點解，腦海裡面一直迴旋住劉德華嘅《開心的馬騮》。
其實，今日我所去嘅地方大致上都好平靜。雖然一眼就睇得出我係大陸落去嘅，但係絕大部分香港人對我都重算友好，無網上流傳得咁不堪。
不過，喺嗰幾日阿英唔只一次提出話要落嚟搵我，重一直問我酒店嘅地址添，我就點都唔肯話佢知，我驚佢真係自己走咗落嚟。
雖然我無遇到啲乜嘢事，但係有啲嘢只怕萬一，有起事上嚟佢走都走得唔快，就算我喺身邊都無能力保護佢。而且，佢大住個肚過關，怕者人哋都唔會畀佢入境。
曾經喺Facebook睇到一條永樂粉麵廠嘅視頻，雖然明知係廣告，但係就一直吸引住我，唔知係因為個老伯對做麵嘅堅持、定抑或佢哋兩仔爺嘅感情，所以我一直打算有機會落香港就去買十個八個蝦子麵試下。7月30號——喺香港嘅第二日，我本來係惗住去買麵嘅，連點樣去都上網查埋喇：从地铁油麻地站乘坐观塘线(坐9站)到地铁九龙湾站A出入口下，走约920米(乘坐出租车共行驶0.9公里，大屿山的士(蓝色)：费用约17港元；新界的士(绿色)：费用约18港元；市区的士(红色)：费用约22港元)到宝康中心 。可惜，都係去唔成。
嗰日早上唔知係唔係空肚飲咗樽牛奶嘅原因，突然間肚屙，仲要屙咗幾次，等到感覺好啲嗰陣就喺電視睇到新聞話八點幾開始觀塘線有人搗亂，用背囊阻止屏蔽門關閉，搞到成條線都要停運，有警員到場但係畀人包圍。唉，噉唯有取消啦。
繼續漫無目的噉周圍蕩、隨緣買下手信。
搭地鐵周圍去
唔記得係邊度，我見到一間鋪頭有大量綠水鬼（睇落唔似係二手嘢），標價十萬蚊鬆啲，而且係港幣。雖然我買唔起，但係同大陸炒到十一萬尚且一鬼難求相比，都重係想講一句：喺香港買真係抵好多——畢竟公價入手基本上係無可能嘅，二級市場嘅行情都已經遠超公價。
嗰晚我無周圍去，食完飯就返酒店睇電視。
嗰幾日我基本上都係睇有線電視新聞台，其實我覺得人哋報道得好客觀，不偏不倚、不吹不黑，唔似央視之流嘅黨喇叭一味淨係斷章取義、扣帽子，令人惡心，就係唔明點解伊啲相對正常嘅媒體反而喺大陸無法立足。
當晚葵湧有五百幾個示威者同防暴警察爆發衝突，幾百人包圍葵湧警署；港鐵話“今朝市區各線分別有76次同47次按動站台同列車內嘅緊急掣”；香港警方喺法國購買嘅水砲車上路測試；觀塘線嘅“不合作運動”有人貼告示，發起下個禮拜罷工……印象最深刻嘅係地鐵站裡面啲示威者齊聲高呼“光復香港，時代革命”，伊啲新聞喺和諧社會絕對睇唔到。
阿英話我唔去現場睇下真係好可惜，我講笑噉話自己肚屙、“怕被人打出屎來”。其實，最主要嘅原因都係應承過我老母唔搞事。
重有一樣嘢想講下：我喺第二晚先發現原來我住嗰間房個門鎖係壞嘅，開門完全唔需要房卡，真係有啲後怕，但係睇在佢哋服務幾好、幫我執得間房好企理，而且我又無唔見嘢，所以就無去服務台投訴，返到嚟重畀咗好評——人哋做生意都唔容易，無謂太苛刻啦。
第三日（31號），本來惗住行到夜先走嘅，但係前一晚新聞話天文台改掛3號強風信號，我擔心好似08年嗰次去香港噉（不過當年好似係打8號風球），而且阿英又一直催我返嚟——其實催到我有啲煩，但係惗深一層，佢咁著緊我係好事啊，唔通好似以前相睇嗰啲女仔噉樣根本唔當我一回事好咩？而家我係應該好好地珍惜嘅，所以我惗住剪埋個髮就走。
久聞彌敦道9號，一心慕名去試下，睇下效果係唔係真係“髮型完全唔襯個面型，個面型又唔襯個身型，個身型又撞返曬個髮型”咁刺激。不過唔知係睇錯導航定係定錯位，一直搵唔到間嘢喺邊，雨又越落越大，唯有放棄，搭東鐵返羅湖過關。
返到屋企先下晝兩點幾，嗰晚就去阿英度食飯囉，同舜舜雞雞佢哋玩。
總嘅嚟講，三日喺香港都係游離浪蕩，感覺一個年假噉就浪費咗。點都好啦，雖然目前睇嚟兩全其美係無乜可能嘅，但係都希望件事可以有個完滿嘅解決方案啦。
人生 不免崎嶇
難以 絕無掛慮
既是同舟在獅子山下且共濟
拋棄區分 求共對
放開 彼此心中矛盾
理想 一起去追
同舟人 誓相隨
無畏 更無懼
香港加油！伊句話喺大陸啲論壇留言、新聞網站跟帖同社交軟件絕對發唔出，但係係我最想講嘅——唔帶任何觀點同政治立場，純粹希望香港可以明天會更好。
Кстати, русский шоколад такой вкусный!
